Երեւան: Մեդիամաքս: ԱՄՆ անանուն դիվանագետն ասել է, որ «թուրքերը շատ դժգոհ են Պուտինի խոսքերից»:
ԱՄՆ Պետական դեպարտամենտի կայքում հրապարակվել է Թբիլիսիում կայացած ամերիկացի երկու դիվանագետների ճեպազրույցի սղագրությունը, որոնք ուղեկցում են ԱՄՆ պետքարտուղար Մայք Պոպմեոյին:
Պատասխանելով Լեռնային Ղարաբաղում թուրք խաղաղապահ հնարավոր ներկայության մասին հարցին, Պետդեպարտամենտի ներկայացուցիչն ասել է.
«Հստակ չէ, թե ինչ են ասում ռուսները մեկ շաբաթ առաջ ձեր բերված համաձայնության մեջ Թուրքիայի դերի մասին: Այնպես որ, պետք է սպասենք եւ տեսնենք: Շատ հետաքրքիր է տեսնել, որ Պուտինն ասում է՝ ոչ, այնտեղ թուրքեր չեն լինելու, եւ թուրքերը շատ դժգոհ են դրանից»:
Նա հավելել է, որ «այլ տարածաշրջաններից արտասահմանցի մարտիկներ բերելը հաստատ չի կարող ընկալվել որպես կայունության նշան»:
Նոյեմբերի 17-ին РТР հեռուստաընկերության հետ հարցազրույցում Ռուսաստանի նախագահն ասել էր, որ հաշվի առնելով 1915 թվականի Հայոց Ցեղասպանության գործոնը, թուրք զինվորների ներկայությունը շփման գծում սադրելու էր հայկական կողմին: «Կարծում եմ, որ նախագահ Էրդողանը դա շատ լավ հասկանում էր եւ հասկացավ», - ասել է Պուտինը:
ՌԴ նախագահն ասել է, որ Թուրքիայի մասնակցությունը սահմանափակվելու է համատեղ դիտորդական կենտրոնի հիմնմամբ Ադրբեջանի տարածքում, որը ԱԹՍ-ների միջոցով վերահսկելու է շփման գծի իրավիճակը:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: