Երեւան: Մեդիամաքս: Հայաստանում ԵՄ պատվիրակության ղեկավար Տրայան Խրիստեան այսօր ասել է, որ փետրվարին կայանալիք նախագահական ընտրությունները կարեւոր կլինեն Հայաստանի եւ Եվրոպական Միության հետագա հարաբերությունների համար:
Ինչպես հաղորդում է Մեդիամաքս-ը, այսօր լրագրողների հետ հանդիպման ժամանակ նա նշել է, որ ԵՄ-ն կշարունակի օգտագործել “Ավելին ավելիի համար” (“more for more”) սկզբունքը:
«Մենք ողջունում ենք բարեփոխումները շարունակելու իշխանությունների պատրաստակամությունը: Մենք արդեն բավականին առաջընթաց ենք գրանցել Ասոցացման համաձայնգրի շուրջ բանակցություններում, սկսել ենք բանակցություններն ազատ առեւտրի գոտու վերաբերյալ եւ փաստացիորեն ավարտել ենք վիզային համակարգի դյուրացման եւ անձանց հետընդունման բանակցությունները”,- ասել է Տրայան Խրիստեան:
Առաջիկա նախագահական ընտրությունների համատեքստում ԵՄ պատվիրակության ղեկավարը նշել է ԵԱՀԿ ԺՀՄԻԳ բոլոր առաջարկների իրագործման կարեւորությունը երկրի իշխանությունների կողմից:
ԵԱՀԿ երեւանյան գրասենյակի ղեկավար Անդրեյ Սորոկինն իր հերթին հիշեցրել է, որ ՀՀ նախագահն իր վերջին ելույթներից մեկում ընդգծել է, որ ընտրությունները կանցկացվեն ԵԱՀԿ ԺՀՄԻԳ առաջարկությունների եւ նկատողությունների համաձայն:
«Գործնականում մենք ստացել ենք Հայաստանի բարձրագույն պաշտոնյայի հավաստիացումն ընտրությունների անցկացման վերաբերյալ»,- ասել է Անդրեյ Սորոկինը:
Նա նշել է, որ ԵԱՀԿ գրասենյակը կշարունակի Հայաստանում ժողովրդավարական բարեփոխումների անցկացմանն ուղղված իր նախագծի իրականացումը: Նախագծի ընդհանուր արժեքը 1,7 մլն եվրո է եւ այն իրականացվում է Հայաստանում ԵԱՀԿ եւ ԵՄ գրասենյակների կողմից:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: