Երեւան: Մեդիամաքս: Հայաստանի կառավարությունը կփոխհատուցի Արցախից բռնի տեղահանված ուսանողների 2023-2024 ուսումնական տարվա մեկ կիսամյակի ուսման վարձը:

Համապատասխան որոշումն ընդունվել է կառավարության այսօրվա նիստում:

Ըստ հիմնավորման՝ ԿԳՄՍ նախարարությունը ԼՂ-ից բռնի տեղահանված ուսանողների մասով ՀՀ պետական բարձրագույն ուսումնական հաստատություններից 2023 թվականի նոյեմբերի 15-ի դրությամբ հավաքագրել է 1836 շահառու (1728 բակալավրի կրթական ծրագրով, 108 մագիստրոսական կրթական ծրագրով), որոնց 2023-2024 ուստարվա մեկ կիսամյակի ուսման վարձի փոխհատուցման գումարի չափը կազմել է 440 մլն դրամ:

ԿԳՄՍ նախարար Ժաննա Անդրեասյանը նշել է, որ քոլեջային մակարդակում կրթություն ստացող շուրջ 2524 ուսանողի համար հատկացվել է 402 մլն դրամ: