Երեւան: Մեդիամաքս: "Ռոսատոմ” ատոմային էներգիայի պետական կորպորացիայի գլխավոր տնօրեն Սերգեյ Կիրիենկոն այսօր Երեւանում հայտարարել է, որ "չի տեսնում Ռուսաստանի մասնակցության կարիքը հայկական նոր ԱԷԿ-ի կառավարմանը”:
Ինչպես հաղորդում է Մեդիամաքս-ը, Սերգեյ Կիրիենկոն տեղեկացրել է, որ այսօր այցելել է Մեծամորի ատոմակայան:
“ԱԷԿ-ի կառավարման հարցում ես կասկածներ չունեմ: Հաշվի առնելով հայ պրոֆեսիոնալ մասնագետների անձնակազմի առկայությունը` նոր ԱԷԿ-ի կառավարմանը Ռուսաստանի մասնակցության կարիք չեմ տեսնում”,- ասել է Ռոսատոմի ղեկավարը:
Սերգեյ Կիրիենկոն տեղեկացրել է, որ նոր ԱԷԿ-ի կառուցման համար արդեն ստեղծվել է “Մեծամոր-Ատոմէներգո” համատեղ ընկերություն, որի բաժնետոմսերի 50%-ը պատկանում է ՀՀ կառավարությանը, մյուս 50%-ը` Ռոսատոմին:
Անդրադառնալով ներդրումներին` Կիրիենկոն նշել է, որ հիմնական ներդրումներն իրականացնելու է հայկական կողմը: “ԱԷԿ-ը կառուցվում է Հայաստանում, եւ դրա նկատմամբ վերահսկողությունը պետք է լինի ՀՀ կառավարության ձեռքում”,- ընդգծել է նա:
Սերգեյ Կիրիենկոն հավելել է, որ ռուսական կողմը պատրաստ է կատարել 20-25% ներդրում եւ ավելին: “Մենք պատրաստ ենք քննարկել մեր ներդրումներն ավելի մեծ ծավալով իրականացնելու հարցը, բայց դա բանակցությունների առարկա է“,- նկատել է Կիրիենկոն:
Նա տեղեկացրել է, որ կողմերն արդեն պայմանավորվել են այն մասին, որ նոր էներգոբլոկում կտեղադրվեն ջրահեռացման ռուսաստանյան ռեակտորներ, ինչպես նաեւ նոր սերնդի բլոկեր, որոնք անցել են անվտանգության ԵՄ պահանջներին համապատասխան ստուգումներ:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: