Երեւան: Մեդիամաքս: Փետրվարի ընթացքում Հայաստանի հանրային հատվածի շուրջ 120 հազ. աշխատակիցներ կստանան կտրոններ, որոնք իրենց նախընտրած ապահովագրական ընկերություն ներկայացնելով, կապահովագրեն իրենց առողջությունը:
Ինչպես հաղորդում է Մեդիամաքս-ը, Հայաստանի ֆինանսների նախարար Վաչե Գաբրիելյանն այսօր ասել է, որ իր ակնկալիքներով, մարտին բոլոր շահառուները արդեն պետք է ապահովագրական պոլիսներ ունենան, քանի որ բուժապահովագրությունը նախապայման է հանրային հատվածի աշխատակիցների համար նախատեսված սոցիալական փաթեթի այլ ծառայություններից օգտվելու համար:
- բժշկական ապահովագրություն (աշխատակիցների համար՝ պարտադիր);
- հիփոթեքային վարկի ամսական վճարի մարում;
- կրթության եւ գիտության նախարարության կողմից հաստատված ուսումնական ծրագրերով ուսման վճար;
- հանգստի կազմակերպում ՀՀ եւ ԼՂՀ տարածքում:
Ֆինանսների նախարարի հավաստմամբ, ապահովագրական պոլիսը ձեռքբերելուց հետո քաղաքացին ինքն է որոշելու, թե ինչպես տնօրինել մնացած 80 հազ. դրամը՝ ապահովագրել ընտանիքի մնացած անդամների առողջությունը, թե օգտվել փաթեթի մյուս ծառայություններից:
Սոցիալական փաթեթի ներդրման համար պետբյուջեից ուղղվել է 18 մլրդ դրամ:
Բուժապահովագրության մեկ ապահովագրական պոլիսը պետության համար կարժենա տարեկան 52 հազ. դրամ, որի պարագայում քաղաքացուն փոխհատուցվող գումարի չափը մեկ տարվա համար կազմում է 3,8 մլն դրամ:
Վաչե Գաբրիելյանը տեղեկացրել է, որ նշված գումարի շրջանակներում ապահովագրական ընկերությունը պետք է փոխհատուցի անհետաձգելի եւ պլանային մի շարք բժշկական ծառայություններ, այդ թվում՝ տարեկան պլանային բուժզննում, թերապեւտիկ բուժում, վնասվածքների եւ էլեկտրահարությունների բուժում, նյարդավիրաբուժական, սրտի վիրահատական միջամտություններ եւ այլն:
Ըստ Վաչե Գաբրիելյանի, սոցփաթեթի ծրագրում որոշվել է ընդգրկել նախարարությունների, կառավարությանն առընթեր մարմինների, պետական ոչ առեւտրային կազմակերպությունների, այդ թվում՝ կրթական եւ մշակութային հաստատությունների եւ սոցիալական պաշտպանության ոլորտների պետական կազմակերպությունների վարչական եւ մասնագիտական պաշտոններ զբաղեցնողներին:
Նախարարը տեղեկացրել է, որ սոցիալական փաթեթը չի տարածվում կադրերի ռեզերվներում գտնվող անձանց, տվյալ մարմնում 6 ամսից պակաս աշխատանքային ստաժ ունեցող աշխատակիցների, կես դրույքից պակաս ծանրաբեռնվածությամբ անձանց, ինչպես նաեւ բարձրաստիճան պաշտոնատար անձանց եւ տեխսպասարկում իրականացնող անձանց վրա: Կրթական հաստատություններից, մասնավորապես, փաթեթից չեն կարողանա օգտվել բուհերի աշխատակիցները:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: