Երեւան: Մեդիամաքս: Հայաստանի բանկերի միության նախագահ Աշոտ Օսիպյանն այսօր ասել է, որ չնայած բարձր գնաճի առկայությանը բոլոր վարկատեսակների տոկոսադրույքները անկում են ապրում եւ դեռեւս կշարունակեն նվազել:

Ինչպես հաղորդում է Մեդիամաքս-ը, Աշոտ Օսիպյանի գնահատմամբ դա կապված է համակարգում առկա իրացվելիության եւ մրցակցության հետ: Նա տեղեկացրել է, որ տնտեսության վարկավորումն առաջին կիսամյակում աճել է 23.4%-ով, իսկ ֆիզանձանց վարկավորումը՝ 8%-ով:

Ըստ Աշոտ Օսիպյանի, բանկային համակարգն ամփոփել է 2011թ. առաջին կիսամյակը՝ 2010թ. հետ համեմատ զգալի աճ արձանագրելով բոլոր ցուցանիշներով:

2011թ. առաջին կիսամյակում ՀՀ բանկային համակարգի ակտիվները աճել են 12.5%-ով եւ կազմել 1 տրլն 763.3 մլրդ դրամ, իսկ վարկային ներդրումներն աճել են 17.8%-ով՝ կազմելով 1 տրլն 179.1 մլրդ դրամ:

Համակարգի ընդհանուր պարտավորությունները հաշվետու ժամանակահատվածում աճել են 14%-ով, իսկ ավանդների գծով պարտավորությունները՝ 9.4%-ով: Հունիսի 30-ի դրությամբ համակարգում ավանդների ընդհանուր ծավալը կազմել է 858.1 մլրդ դրամ:

Առաջին կիսամյակում բանկային համակարգի ընդհանուր կապիտալը աճել է 6.7%-ով եւ կազմել 352.5 մլրդ դրամ: Համակարգի զուտ շահույթն առաջին կիսամյակում կազմել է 21.7 մլրդ դրամ: