Երեւան: Մեդիամաքս: ՀՀ պաշտպանության նախարար Դավիթ Տոնոյանն ու Հայաստանի գիտության եւ տեխնոլոգիաների հիմնադրամի (FAST) հիմնադիր տնօրեն Արմեն Օրուջյանը քննարկել են ՊՆ-ի եւ հիմնադրամի համագործակցության ուղիները:
ՊՆ հաղորդագրության համաձայն՝ ներկայացվել են զինծառայողների կրթական նոր ծրագրերի համար մշակված դասընթացները, դրանց ներդրման ժամկետներն ու ձեւաչափերը: Կրթական ծրագրերը ներառելու են տվյալագիտության, արհեստական բանականության, կիբերանվտանգության եւ զինված ուժերի համար հեռանկարային կիրառություններ ունեցող այլ ոլորտներ:
Դավիթ Տոնոյանն ընդգծել է զինված ուժերում բարձրորակ կրթական ծրագրերի ստեղծման եւ զինծառայողների գիտատեխնիկական հմտությունների զարգացման կարեւորությունը:
«Ծրագրերը միտված են միջազգային լավագույն փորձի կիրառությամբ ռազմական եւ քաղաքացիական ոլորտների միջեւ «տաղանդների շրջապտույտ» ստեղծելուն: Վերջինս կնպաստի նաեւ նորարարությունների քաղաքացիական էկոհամակարգի զարգացմանը»,- նշել է Արմեն Օրուջյանը:
