Երեւան: Մեդիամաքս: Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցն այսօր ասել է, որ իրավապաշտպան կազմակերպությունների կողմից 2005-2011թթ. ընթացքում ընթացիկ տարվա սեպտեմբերի 1-ի դրությամբ ՀՀ Զինված ուժերում զինծառայողների սպանության 306 դեպք է արձանագրվել:

Ինչպես հաղորդում է Մեդիամաքս-ը, իրավապաշտպանը տեղեկացրել է նաեւ, որ 2007-2011թթ. արձանագրվել է սպանության 228 դեպք, որից միայն 32-ն են տեղի ունեցել զինադադարի ռեժիմի խախտման պատճառով: «Այն, ինչ կատարվում է մեր զինված ուժերում, մարդու իրավունքների կոպիտ խախտում է, նաեւ մարդու կյանքի իրավունքի խախտում»,- ասել է Արթուր Սաքունցը:

Հայաստանի Հելսինկյան կոմիտեի նախագահ Ավետիք Իշխանյանն անդրադարձել է  զինծառայող Հովհաննես Վարդանյանի դեպքին, որին, ըստ «Չենք լռելու» նախաձեռնության տվյալների, «բանակում հասցրել են խելագարության, ուղարկել հոգեբուժարան, վաղաժամ զորացրել եւ անտերության մատնել»:

«Անպատժելիության մթնոլորտը բերում է նոր զոհերի»,- ասել է Ավետիք Իշխանյանը:

Այսօր կայացած ասուլիսի ընթացքում մի շարք իրավապաշտպան կազմակերպություններ հանդես են եկել հայտարարությամբ, որով պահանջում են ՀՀ նախագահ, Գլխավոր գերագույն հրամանատար Սերժ Սարգսյանից անհապաղ ապահովել 1994 թ-ից մինչ օրս բանակում սպանությունների քրեական գործերի վարույթների ուսումնասիրության կազմակերպումը, խաղաղ պայմաններում մահացած զինծառայողների ընտանիքներին պատճառված վնասի արժանապատիվ փոխհատուցումը:

«Մեկ ամսում գործուն քայլեր չձեռնարկելու պարագայում հայկական բանակում տիրող իրավիճակի համար մեղավոր եւ հովանավոր ենք համարելու ՀՀ Գլխավոր գերագույն հրամանատար Սերժ Սարգսյանին եւ պահանջելու նրա հրաժարականը»,- ասված է հայտարարության մեջ: