Ամերիկյան Time ամսագիրը ընտրել է «Բոլոր ժամանակների ամենաազդեցիկ 100 լուսանկարները»: Մեդիամաքսը պարբերաբար իր ընթերցողներին է ներկայացնում Time-ի պատմությունները այդ լուսանկարների ստեղծման մասին:
Քրիս Հոնդրոս
Իրաքցի աղջիկը անցակետում
2005թ.
Քրիս Հոնդրոսի այս լուսանկարից րոպեներ առաջ փոքրիկ Սամար Հասանն իր ընտանիքի հետ Թալ Աֆար քաղաքից մեքենայով տուն էր ուղեւորվում: Լուսանկարում Սամարն արդեն որբ է՝ նրա ծնողներին սպանեցին ԱՄՆ-ի զինվորները՝ մտածելով, որ մեքենայում կարող են ապստամբներ կամ ինքնասպան ահաբեկիչներ գտնվել:
2005 թվականի հունվարն էր՝ Իրաքի պատերազմի առավել դաժան պահերից մեկը: Այդպիսի զարհուրելի պատահարները հազվադեպ չէին, սակայն դրանք երբեք չէին փաստագրվել իրական ժամանակում: Քրիս Հոնդրոսը, որն աշխատում էր Getty Images-ի համար, գտնվում էր զորամասում: Նա անմիջապես փոխանցեց արված լուսանկարները եւ դրանք անմիջապես տարածվեցին ողջ աշխարհում:
Լուսանկարները ստիպեցին ԱՄՆ-ի ռազմական ղեկավարությանը վերանայել Իրաքի անցակետերում իրականացվող ստուգման գործընթացը:
Քրիս Հոնդրոսը սպանվեց 2011 թվականին՝ Լիբիայի քաղաքացիական պատերազմը լուսաբանելիս:
Time ամսագիր
Պատրաստեց Աննա Բուբուշյանը
