Սարգիս Ստեփանյանն այն մարդկանցից է, ովքեր կյանքի դժվարություններից միմիայն ուժեղանում են ու ոգեշնչման օրինակ դառնում:
Նրա եռանդն ու ավելին անելու ցանկությունը հսկայական են, գիտի, որ իր առաքելությունը նաեւ մյուսներին օգնելն ու իր հետեւից տանելն է:
Զինվորական, մարզիկ, ոսկե մեդալակիր ու պարզապես անկոտրում մարդ Սարգիս Ստեփանյանն է «Սպորտը բոլորի համար» շարքի այսօրվա հերոսը:
Հագեցած ու հետաքրքիր տարին
Հայաստանի Հաշմանդամային սպորտի ֆեդերացիան գործում է 2018-ի հունիսից, իսկ սեփական մարզադահլիճը, որն անչափ ոգեշնչող անուն ունի՝ «Լեգենդներ», բացվել է սեպտեմբերին: Մայոր Ստեփանյանը համոզված է, որ այդ դահլիճից բազմաթիվ լեգենդներ են դուրս գալու ու մեծ ճանաչում ձեռք բերելու:
Հիմնական ուղղվածությունն ուժային մարզաձեւերի վրա է, որովհետեւ մեր մարզասարքերը դրանց են հարմարեցված: Զարգացնում ենք սեղմում հենարանից վարժությունն ու բազկամարտը, շուտով կավելանա նաեւ գնդի հրումը, այն Պարալիմպիկ մարզաձեւ է:
![](https://c1.mediamax.am/datas/znews/big_/2019/05/1558077459_5898482.jpg)
Լուսանկարը` Մեդիամաքս
Նախորդ տարի Հայաստանի ուժային եռամարտի ֆեդերացիայի հետ անցկացրել են սեղմում հենարանից վարժության Հայաստանի առաջնությունը: Ստեփանյանը շատ գոհ է մրցաշարից, քանի որ այն միջազգային բոլոր չափորոշիչներին համապատասխան է եղել:
Այս տարվա կարեւոր նպատակներից է ամռանը Սեւանում ճամբար կազմակերպելն ու այն հետաքրքիր անցկացնելը: Անպայման դժվարություններ կլինեն, որոնք մեր մարզիկները կհաղթահարեն, վրաններում կմնան, երեկոներն էլ խարույկի մոտ կանցկացնեն: Պարզապես չեն գա վայելելու, հեշտ բաներ ինքս էլ չեմ սիրում:
Ճամբարը կտեւի մի քանի օր, որի ընթացքում էլ կլինեն 3 մարզաձեւերի մրցումները: Գնդի հրման համար նախատեսված նստատեղերն արդեն պատվիրել են, ֆեդերացիան հետաքրքիր ու իրադարձություններով առատ օրեր է խոստանում:
Նպատակներն ու գաղափարախոսությունը
Հաշմանդամային սպորտի ֆեդերացիայի նպատակը պրոֆեսիոնալ սպորտը զարգացնելն ու առողջությունը վերականգնելն է: «Լեգենդներ» մարզադահլիճ հիմնականում այցելում են նրանք, ովքեր ցանկանում են գեղեցիկ մարմին ունենալ ու լավ մարզիկներ դառնալ:
Տարեվերջին պլանավորել ենք Աշխարհի գավաթին մոտ 5-6 ներկայացուցիչ ունենալ: Շատ լավ մարզիկներ ունենք, ովքեր խիստ պարապմունքներ են անցկացնում ու լավացնում իրենց ցուցանիշները: Նրանք ցանկանում են միջազգային մրցումներում հաջող հանդես գալ:
![](https://c1.mediamax.am/datas/znews/big_/2019/05/1558077459_3711755.jpg)
Լուսանկարը` Մեդիամաքս
Սարգիս Ստեփանյանն ընդգծում է, որ իրենց ֆեդերացիան հաշմանդամություն ունեցող մարդկանց խնդիրներով զբաղվող այլ կառույցներից շատ է տարբերվում, այստեղ ամենօրյա աշխատանք է տարվում մարզիկների հետ: Պարբերաբար այցի են գալիս նաեւ նրա մարտական ընկերներն ու ծառայելու ընթացքում հաշմանդամություն ձեռք բերածները:
Ամենօրյա աշխատանք ենք կատարում, ոչ թե տարվա մեջ 1-2 միաջոցառում անցկացնում ու մարդկանց իրենց հոգսերով ճանապարհում: Գեւորգ Ստեփանյանը կիրակիից բացի ամեն օր համարյա 12 ժամ դահլիճում է լինում, մարզչական աշխատանք կատարում ու բոլորին անհատական մոտեցում ցուցաբերում: Դա բավական բարդ է, ամեն վայրկյան ծանրոցը տալիս է, դնում տեղը, բոլորի խնդիրներին տեղյակ է, նա մարզիկներին այնքան լավ է հասկանում: Մեզ մոտ շատ ջերմ ու ընկերական մթնոլորտ է տիրում: Չենք տարանջատում զինվոր ժամանակ են հաշմանդամ դարձել, թե դժբախտ պատահարի: Բոլորս նույն ցավն ենք քաշում ու իրար շատ օգնում:
Ծանրամարտից մինչեւ բազկամարտ
Ստեփանյանը սպորտի հետ միշտ է կապված եղել: Ավելի վաղ ծանրամարտով է զբաղվել ու սպորտի վարպետի կոչում ունի: 2015 թվականից էլ Արտավազդ Նալբանդյանի գլխավորությամբ բազկամարտով է պարապում, մի շարք խոշոր միջազգային մրցաշարերի է մասնակցել ու մեդալներ նվաճել:
![](https://c1.mediamax.am/datas/znews/big_/2019/05/1558077459_8778960.jpg)
Լուսանկարը` Մեդիամաքս
Հայերը հոգեպես շատ ամուր են: Երբ հաշմանդամություն ես ձեռք բերում (թեեւ մեզ հաշմանդամ չենք համարում, քանի որ ոչ ոքից չենք տարբերվում), արագ ես մտածում, ավելի շատ աշխատում, բայց իրականում ուզած-չուզած ինչ-որ չափով սահմանափակվում ես: Իսկ երբ ոգուդ հետ նաեւ ֆիզիկապես ես ուժեղանում, ավելի ամուր ես դառնում: 2 ոտք ու աջ ձեռք չունեմ, որպեսզի նստած տեղից կանգնեմ, պետք է ձախով հենվեմ ու բարձրանամ: Եթե ձեռքս թույլ լինի, չեմ կարողանա, հասարակ օրինակ է, բայց ցույց է տալիս, թե որքան կարեւոր է ֆիզիկապես ամուր լինելը:
Նա համոզված է, որ ցանկացած դժվարություն նախ ոգով պետք է հաղթահարել ու չընկճվել: Պրոֆեսիոնալ սպորտն օգնում է հաղթողի հոգեբանություն ձեռք բերել, իսկ երբ տարիների քրտնաջան աշխատանքը հասնում է գագաթնակետին ու արդյունք ապահովում, հոգեբանորեն չափազանց ամուր է դարձնում:
Հաղթողի գաղափարը մտնում է մարդու մեջ, նա հասկանում է, որ անպարտելի է, ցանկացած խոչընդոտ կարող է հաղթահարել, թույլ լինելու իրավունք չունի: Ինձ հետ մարզվող ընկերներից շատ բան եմ սովորում, իրարով ենք ոգեւորվում, ուժեղանում:
![](https://c1.mediamax.am/datas/znews/big_/2019/05/1558077459_9779284.jpg)
Լուսանկարը` Մեդիամաքս
Ստեփանյանը հիմա մասնակցում է Հունաստանի Լուտրակի քաղաքում ընթացող Եվրոպայի բազկամարտի առաջնությանը: Հայաստանը ներկայացնում է նաեւ Խաչատուր Սարիբեկյանը: Մրցաշարին, ինչպես միշտ, մայորը մարտական է տրամադրված, ուզում է նորից հաղթել ու իր օրինակով ոգեշնչել դահլիճում մարզվողներին:
Մրցակիցներն իմ դեմ պայքարին միշտ տրամադրվում են, պետք է նախորդ արդյունքս բարելավել, ավելի լավ հանդես գալ ու պաշտպանել տիտղոսներս՝ Աշխարհի ու Եվրոպայի գործող չեմպիոնն եմ:
Ստեփանյանը մարզումները երբեք չի դադարեցնում, միայն մրցումներից մի քանի օր հետո է հանգստանում: Հայաստանի Զինված ուժերում է ծառայում, սիրում է իր աշխատանքն ու սպորտը: Հուլիսին Խորվաթիայում նոր մրցաշարի՝ Աշխարհի Գավաթին է մասնակցելու, հոկտեմբերին՝ Ռումինիայում ԱԱ-ին, տարին հագեցած ու ծանրաբեռնված է լինելու, բայց նորանոր նպատակներն ավելի են իմաստավորում կյանքը:
Ցավոք սրտի, մեր շարքերը համալրվում են`սահմանում մարտական առաջադրանքներ կատարելիս ու հայրենիքի պաշտանության ժամանակ զինվորներ են վիրավորվում ու դժբախտ պատահարներ լինում: Մենք պետք է ցույց տանք, որ ամեն պարագայում հնարավոր է հաղթել:
![](https://c1.mediamax.am/datas/znews/big_/2019/05/1558077459_2176098.jpg)
Լուսանկարը` Մեդիամաքս
Մարզադահլիճն ու նորը կառուցելու պլանները
«Լեգենդներ» այցելողների թիվը 30-ից ավելի է, այստեղ կողք կողքի մարզվում են հաշմանդամություն ունեցողներն ու չունեցողները, վերջիններս 10 հազ. դրամ են վճարում, գումարը վարձակալությանն ու կոմունալ ծախսերին է տրամադրվում:
Հենց սկզբից էլ ֆեդերացիան ցանկացել է նպաստել նրանց ինտեգրմանն ու փոխադարձ շփում ապահովել, որ միասին մարզվեն ու օգնեն իրար: Մարզերից էլ հաճախողներ ունեն, սակայն տրանսպորտի հետ կապված խնդիրների պատճառով միշտ չէ, որ կարողանում են լինել դահլիճում:
Եթե մեր մարզիկներին առանձնացնենք, ոչ մի արդյունք էլ չի լինի: Բացի այդ էլ, իրար օրինակ են ծառայում: Հաշմանդամություն չունեցողները տեսնում են, թե ինչպես են սայլակով իրենց բարձրացնում, զարմանում են, որ այդպիսի բան հնարավոր է: Տեսնում են՝ ինչպես են հաշմանդամություն ունեցողները մարզվում ու ինչ դժվարություններ են հաղթահարում, իրենցից հպարտ հայացք ունեն , ոչ մի բանից չեն տրտնջում ու բողոքում: Հասկանում են, որ նեղվելու իրավունք չունեն:
![](https://c1.mediamax.am/datas/znews/big_/2019/05/1558077459_2275178.jpg)
Լուսանկարը` Մեդիամաքս
Ֆեդերացիան նպատակ ունի հետագայում նմանատիպ դահլիճներ բացել նաեւ Գյումրիում, Վանաձորում ու Արցախում: Դեռ կենտրոնացած են Երեւանում նոր մարզադահլիճի կառուցման վրա: Քաղաքապետարանը դեկտեմբերին տարածք է հատկացրել, որտեղ էլ լինելու է նոր դահլիճը:
Ճիշտ է, լրիվ անմխիթար է, պատեր են միայն, բայց մեծ պլաններ ունենք: Հիմա հովանավորներ ունենք, բայց մեծ գումարի մասին է խոսքը, ուզում ենք երկհարկանի դահլիճ կառուցել՝ փոքրիկ առողջարարական լողավազանով ու լավ մարզասրահով, նաեւ հաշմանդամություն ունեցողների համար տարբեր խմբակներ կունենանք:
Առաջին հերթին ցանկանում են նույն ոգին ու տրամադրվածությունը նոր դահլիճ տեղափոխել: Ստեփանյանը լավ գիտի, որ Հայաստանում մարզվելու համար շատ դահլիճներ կան, բայց դրանք չեն տրամադրում պարապելու համար:
Պետական մոտեցում այս հարցում չկա, ես չեմ էլ դիմել, էությամբ այնպիսին եմ, որ արդյունք լինելու դեպքում կդիմեմ միայն: Բայց դահլիճն անպայման կյանքի կկոչենք, ամբողջ հայությամբ կանենք, նահանջելու տեղ չկա:
![](https://c1.mediamax.am/datas/znews/big_/2019/05/1558077459_1954404.jpg)
Լուսանկարը` Մեդիամաքս
Մեծ առաքելությունն ու աջակիցները
Հաշմանդամություն ձեռք բերելուց հետո սեփական նախաձեռնությամբ է Սարգիս Ստեփանյանը սկսել սպորտով զբաղվել: Արտավազդ Նալբանդյանին գտնելուց հետո միասին սկսել են աշխատել ու խոչընդոտներն էլ համատեղ ուժերով հաղթահարել: Նա իր օրինակով հիանալի գիտի, թե որքան արգելքների են հանդիպում հաշմանդամություն ունեցողները: Շատ էր ցանկանում սպորտային կառույց բացել, որտեղ հարմարեցված պայմաններ կլինեին բոլորի համար:
Իրենց հաջողությունները Ստեփանյանը նշանակալի կհամարի, երբ ֆեդերացիայի 5-6 մարզիկներ կարողանան միջազգային խոշոր մրցումների մասնակցել ու մեդալներ նվաճել: Համոզված է, որ բացերն առաջիկա տարիներին կհաղթահարվեն:
Բազկամարտի առաջին միջազգային մրցաշարին մասնակցելուց ի վեր մարզիկի կողքին է ու աջակցում է Հայ վիրավոր հերոսների ֆոնդը:
Այն նաեւ հայոց բանակի կողքին է ու կարեւորագույն առաքելություն է կատարում: Ամբողջ առաջնագիծն առաջին բուժօգնության պայուսակներով է համալրել՝ անհրաժեշտ բոլոր պարագաներով:
Ուժեղ լինելու գաղտնիքը
Սպորտում ու կյանքում անելիքներ Սարգիս Ստեփանյանը շատ ունի, նա չափազանց շատ փորձությունների միջով է անցել ու գնահատում է ամեն մի վայրկյանը:
Աստված է ինձ կենդանի պահել: Երբ 2014-ին վիրավորվել եմ, շատ ծանր եմ եղել, 3,5 լիտր արյուն եմ կորցրել, սիրտս մի քանի անգամ կանգ է առել, աննկարագրելի վատ եմ եղել: Այդքանից հետո, որ չեմ մահացել, ուրեմն պետք է կենդանի մարդուն վայել ապրեմ: Եթե նվնվամ, դժգոհեմ, որ չի ստացվում, ավելի լավ չի լինի:
![](https://c0.mediamax.am/datas/znews/big_/2019/05/1558077459_5009104.jpg)
Լուսանկարը` Մեդիամաքս
Նա ուժեղ է իր ժողովրդով ու ընկերներով, համոզված է, որ միայնակ ոչնչի էլ չի հասնի: Իսկ երբ իր հաղթանակներով ու հաջողություններով բոլորն են ուրախանում, հպարտությանը չափ չի լինում:
Դա նաեւ պարտավորեցնում է ու միաժամանակ ուժեղ դարձնում: Ինձ ուժեղ եմ համարում, իմ շուրջն էլ են այդպիսի մարդիկ խմբված: Ոգով թույլ մարդկանց չեմ ընդունում:
«Լեգենդներում» էլ թույլ մարդիկ չեն մարզվում, երբ հասկանում են, որ այն իրենց տեղը չէ, էլ չեն հաճախում: Մարզադահլիճը նպատակ ունի օրինակելի դառնալ ու չեմպիոնների պատրաստել:
Թույլ լինելու իրավունք չունենք: Հակառակը, պետք է մյուսներին օգնենք ավելիին հասնել: Մեր տղաներին ու աղջիկները մեկը մյուսից ուժեղ են ու գեղեցիկ, նրանք մեծ նպատակներ ունեն, որոնց իրականացմանն էլ օգնում ենք:
Հասմիկ Բաբայան, Գոհար Նալբանդյան
«Սպորտը բոլորի համար» նախագիծն իրականացվում է «Լսարանի ճանաչում եւ թվային աջակցություն» ծրագրի շրջանակում՝ Մեդիա նախաձեռնությունների կենտրոնի, Ինտերնյուս Եվրոպայի եւ Շվեդիայի միջազգային զարգացման գործակալության (SIDA) ֆինանսական աջակցությամբ։
![](https://mediamax.am/images/anna/logo/1_15.jpg)
![](https://mediamax.am/images/anna/logo/2_8.jpg)
![](https://mediamax.am/images/anna/logo/3_5.jpg)
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: