1989 թվականի ամռանը Լոնդոնի Metropolis Studios ստուդիայում ձայնագրվեց Deep Purple խմբի Smoke on the water հիթի «աստղային» տարբերակը՝ 1988 թվականի Սպիտակի երկրաշարժից տուժած Հայաստանին օգնելու նպատակով: Rock Aid Armenia-ի 30-ամյակին նվիրված հատուկ նախագիծը բացահայտում է ծրագրի մանրամասները:
Նախագիծն իրականացվում է Հայաստանում Բրիտանական Խորհրդի գրասենյակի աջակցությամբ:
***
1990 թվականին Rock Aid Armenia-ի թողարկած «The Earthquake Album»-ը վաճառվեց ավելի քան 100 000 օրինակով եւ «ոսկե» դարձավ: Սա առաջին բարեգործական ալբոմն էր, որը նման արդյունք գրանցեց:
Պատմում է Rock Aid Armenia-ի հիմնադիր Ջոն Դին.
«Մեծ Բրիտանիայում Խորհրդային Միության դեսպանին ճանաչում էի 1988 թվականից, երբ մասնակցել էի «Աշխարհն ՁԻԱՀ-ի դեմ» գլոբալ հեռուստատեսային նախագծի կազմակերպմանը: ԽՍՀՄ դեսպանությունը մեծ աջակցություն ցուցաբերեց այդ հեռարձակման հետ կապված:
Ուստի, երբ «The Earthquake Album»-ը հաջողեց, խոսեցի ԽՍՀՄ դեսպանի եւ առաջարկեցի, որ հատուկ միջոցառում կազմակերպենք դեսպանությունում՝ մեր հաջողությունը տոնելու համար:
Նա համաձայնեց տարածք տրամադրել ԽՍՀՄ դեսպանությունում, որտեղ մենք կարող էինք ոսկե սկավառակները շնորհել այն երաժիշտներին, ովքեր մասնակցել էին ձայնագրություններին:
Հիանալի օր էր՝ մեր երախտագիտությունը հայտնեցինք բոլոր այն մարդկանց, ովքեր աջակցել էին մեզ: «Սառը պատերազմը» դեռ շարունակվում էր, բայց այդ միջոցառումը իր ուրույն դերը խաղաց Արեւելքի եւ Արեւմուտքի միջեւ պատնեշների վերացման գործում»:
Խոսելով միջոցառման ժամանակ, Իէն Գիլանն ասել էր.
«Շատ լավ եմ հիշում այն օրը, երբ այցելեցի Սպիտակ: Ավելի ուշ, երբ ինձ հարցրեցին տպավորություններիս մասին, չկարողացա ոչինչ պատասխանել՝ արցունքներս խեղդում էին. անհնար է նկարագրել այն, ինչ տեսա: Ես դա կհիշեմ մինչեւ կյանքիս վերջ»:
Կարդացեք նաեւ.
Led Zeppelin-ի, The Who-ի եւ մեծ թենիսի հետքը Rock Aid Armenia-ում
Գիլմորը, Գիլանը եւ Դիքինսոնը՝ ուղիղ եթերում ԽՍՀՄ-ի համար
Իէն Գիլանը, Ջոն Դին եւ «որբերի դասարանը» Սպիտակում
Wembley-ի հորինված համերգը եւ հանդիպումը Ստաս Նամինի հետ
Ինչպես Ռոջեր Թեյլորը դարձավ Rock Aid Armenia-ի թմբկահարը
Դէվիդ Գիլմորն օգնեց ձեւավորել Rock Aid Armenia-ի աստղաբույլը
«Կոմսոմոլկայի» 1989-ի անդրադարձը Rock Aid Armenia-ին
***
2019 թվականի հունիսի 5-ին Երեւանում տեղի ունեցավ հանդիսավոր երեկո` նվիրված Rock Aid Armenia-ի 30-ամյակին: Երեկոյին մասնակցելու նպատակով Երեւան էին ժամանել ռոքի լեգենդները՝ Deep Purple-ի վոկալիստ Իէն Գիլանը եւ Black Sabbath-ի կիթառահար Թոնի Այոմին, ինչպես նաեւ Rock Aid Armenia նախագծի հեղինակ Ջոն Դին: Այցի եւ տոնակատարության կազմակերպիչներն էին Մեդիամաքս մեդիա ընկերությունը եւ DoSomething կազմակերպությունը (Ավստրալիա):
Rock Aid Armenia ծրագրի 30-ամյակի եւ ռոք աստղերի այցի գլխավոր հովանավորը IDBank-ն էր: Միջոցառման գործընկերը Koor գինին էր:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: