Իր ինքնակենսագրական «Ֆրանսիական ֆուտբոլի օձը» գրքում Ֆրանսիայի հավաքականի կազմում Աշխարհի ու Եվրոպայի չեմպիոն Յուրի Ջորկաեֆը պատմել է, թե ինչպես է աշխարհահռչակ Շառլ Ազնավուրի հետ հանդիպել խաղադաշտում:
Mediamax Sport-ի «Մեկ կադրում» շարքում այսօր հիշելու ենք հեռավոր 1999 թվականին Ֆրանսիա-Հայաստան հանդիպման մեկնարկը: Այդ դրվագի ու Ազնավուրով տարվածության մասին պատմում է Ջորկաեֆը:
«Ֆրանսիայի ու Հայաստանի ֆուտբոլի ազգային հավաքականները ԵՎՐՈ-2000-ի ընտրական մրցաշարում հայտնվել էին նույն խմբում:
«Ստադ դե Ֆրանսում» գնդակը խաղի մեջ մտցրեց Շառլ Ազնավուրը: Ինձ համար նա աստված էր: Երաժշտարվեստին նրա բերած նպաստը անգնահատելի է, «Երկու կիթառներն» իմ ամենասիրելի գործն է:
Հայ դատին Ազնավուրի ներգրավվածությունը շատ կարեւոր էր, 1988 թ. դեկտեմբերի 7-ի ավերիչ երկրաշարժից հետո, որն ավելի քան 30 հազար մարդու կյանք խլեց, նա շատ մեծ օգնություն էր ցուցաբերել:
Ազնավուրը մոբիլիզացրեց բոլորին ու երկրաշարժից փրկվածներին ուղարկեց հագուստներով բարձված բազմաթիվ բեռնատարներ:
Ես առիթ եմ ունեցել զրուցելու նրա հավատարիմ իմպրեսարիո Լեւոն Սայանի հետ, ինչպես նաեւ ներկա գտնվելու Ազնավուրի՝ Լիոնում տված համերգին եւ նրան շնորհավորելու իր սենյակում: Համերգի ավարտից հետո միասին ընթրել ենք:
Պատմության մեջ առաջին Ֆրանսիա-Հայաստան խաղը 1999 թվականի մարտի 31-ին ավարտվեց մեր հաղթանակով, 2 անպատասխան գնդակ խփեցինք: Ճիշտ է Հայաստանի ընտրանու դարպասապահ Ռոման Բերեզովսկին արտակարգ խաղ ցույց տվեց, բայց հանդիպման հերոսը Ալեն Պողոսյանն էր՝ Ֆրանսիայի հավաքականի մյուս հայը: Մենք երկուսով կազմակերպեցինք 2-րդ գոլը»:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: