«Մարդապատում» հատուկ նախագծի հեղինակներ Մարիամ Լորեցյանն ու Լենա Գեւորգյանը «Ոսկե Ծիրան» կինոփառատոնի հյուրերին հարցրել են` ո՞րն է առաջին միտքը, որ ունենում են «Երեւան» ասելիս:
Ջովանի Դոնֆրանչեսկո, իտալացի ռեժիսոր եւ պրոդյուսեր
Երեւան ասելիս մոգություն եմ պատկերացնում
Ջովանի Դոնֆրանչեսկո, իտալացի ռեժիսոր եւ պրոդյուսերԼուսանկարը` Մեդիամաքս
Անցյալ տարի առաջին անգամ եղա Երեւանում ու եթե այս նույն հարցն ինձ այն ժամանակ տայիք, վստահ եմ, այլ բան կպատասխանեի: Երեւանն ինձ համար մշտապես ինչ-որ մոգական երեւույթ է եղել: Երբեւէ չեմ ճանաչել հայկական մշակույթը, բայց չեմ կարող բացատրել, թե ինչու, միշտ երազել եմ տեսնել Հայաստանը: Հիմա, երբ արդեն երկրորդ անգամ եմ Երեւանում, կարող եմ ասել` իսկապես մոգական քաղաք է: Հիմա մի ուրիշ երազանք ունեմ` էլ ավելի բացահայտել ինձ համար Հայաստանը, որովհետեւ այն այնքան մանրուքներ ունի:
Զազա Ուրուշաձե, վրացի ռեժիսոր, Վրաստանի Կինեմատոգրաֆիստների միության նախագահ
Երեւան ասելիս ջերմություն եմ զգում
Զազա Ուրուշաձե, վրացի ռեժիսոր, Վրաստանի Կինեմատոգրաֆիստների միության նախագահԼուսանկարը` Մեդիամաքս
Որքան էլ զարմանալի է, առաջին անգամ եմ Երեւանում ու այնքան եմ հավանել: Միշտ էլ Երեւանը ինձ համար հարազատ մի քաղաք է եղել: Բայց անկեղծ ասեմ, մինչ այստեղ լինելը չէի կարծում, որ քաղաքն այսքան գեղեցիկ է: Ոչ թե վատ կարծիք ունեի Երեւանի մասին, այլ լուսանկարները դիտելով, լրիվ այլ բան էի սպասում տեսնել: Իսկ հիմա եկա Երեւան ու կարծես տանը լինեմ, շատ հաճելի զգացողություն է: Ի դեպ, հայ շատ ընկերներ ունեմ ու շատերը նախանձեցին, երբ իմացան, որ Երեւան եմ գալիս:
Ռոբեր Գեդիգյան, ֆրանսիացի ռեժիսոր
Երեւանն ինձ համար տարածք է
Ռոբեր Գեդիգյան, ֆրանսիացի ռեժիսորԼուսանկարը` Մեդիամաքս
Վերջին 15 տարիների ընթացքում ամեն տարի գալիս ենք Երեւան, շատ հարազատ ընկերներ ունենք այստեղ:
Արիան Ասկարիդ, ֆրանսիացի դերասանուհի
Երեւան ասելիս մարդկություն եմ հասկանում
Արիան Ասկարիդ, ֆրանսիացի դերասանուհիԼուսանկարը` Մեդիամաքս
Ազգությամբ հայուհի չեմ, բայց արդեն վաղուց ընդունել եմ Երեւանն ու վստահ եմ` Երեւանն էլ ինձ է ընդունել: Ես զգում եմ դա:
Կիմ Դոն Հո, կորեացի ռեժիսոր, Պուսանի միջազգային կինոփառատոնի հիմնադիր
Երեւան ասելիս ծիրանն եմ հիշում
Կիմ Դոն Հո, կորեացի ռեժիսոր, Պուսանի միջազգային կինոփառատոնի հիմնադիրԼուսանկարը` Մեդիամաքս
Առաջին անգամ Երեւան եմ եկել 2006 թվականին: Երբ լսում եմ Երեւանի մասին, մտքիս միանգամից մտքիս ծիրանն է գալիս, հետո մտածում եմ ցեղասպանության մասին, վերջում եմ հիշում եմ այստեղ ապրող շատ բարի ժողովրդի մասին:
Ռոբ Նիլսոն, ամերիկացի ռեժիսոր, դերասան
Երեւանը ծովահենի մայրաքաղաքն է
Ռոբ Նիլսոն, ամերիկացի ռեժիսոր, դերասանԼուսանկարը` Մեդիամաքս
Երբ ասում են Երեւան, միանգամից ծովահեններ եմ պատկերացնում, որովհետեւ Հարությունը («Ոսկե Ծիրան» փառատոնի տնօրեն Հարություն Խաչատրյանը-Մեդիամաքս) ինձ ծովահեն է հիշեցնում: Կարծում եմ, նա պիտի 16-րդ դարում ապրեր: Երբ ես նրան ասացի դրա մասին, բանի տեղ չդրեց, կարծում եմ` նույնիսկ չլսեց, թե ինչ եմ ասում:
Շոն ՄքՔալիսթեր, բրիտանացի վավերագրող
Երեւան ասելիս համեղ ուտեստներն եմ հիշում
Շոն ՄքՔալիսթեր, բրիտանացի վավերագրողԼուսանկարը` Մեդիամաքս
Հիմա Երեւանը շատ լավ ճանաչում եմ, բայց ճիշտն ասած, մինչ այդ պատկերացում անգամ չունեի Երեւանի մասին: Ու ինչքան էլ որ ցավալի չէ, շատերը չգիտեն Երեւանի մասին: Վստահ գիտեմ, որ Երեւանում հանգստանալու եմ, ինձ ապահով եմ զգալու: Սիրում եմ երեւանյան եղանակը, սովորույթները: Այստեղ այնքան հանգիստ է: Մեզ մոտ բոլորը մշտապես շտապում են, բոլորը զբաղված են: Իսկ այստեղ կարող եմ ինձ թույլ տալ ծուլանալ, հայկական գինի կամ կոնյակ վայելել ու «Ուինսթոն Չերչիլ»-ի կենսակերպով ապրել: Գուցե հաջորդ ֆիլմս հենց դրա մասին լինի` երեւանյան Ուինսթոն Չերչիլը:
Լենա Գեւորգյան (տեքստ)
Մարիամ Լորեցյան (լուսանկարներ)
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: