Ուկրաինայի նախագահ Վլադիմիր Զելենսկին փետրվարի 28-ին լրագրողների ներկայությամբ Սպիտակ տանը բանավիճել է ԱՄՆ նախագահ Դոնալդ Թրամփի եւ փոխնախագահ Ջեյ Դի Վենսի հետ:

Վեճից հետո Զելենսկին լքել է Սպիտակ տունը, իսկ հանքանյութերի վերաբերյալ համաձայնագրի ստորագրման արարողությունը եւ մամուլի ասուլիսը չեղարկվել են:

Ստորեւ ներկայացված է Սպիտակ տանը տեղի ունեցած բանավեճի ամբողջական սղագրությունը:

Լրագրող. Լեհաստանը Երկրորդ համաշխարհային պատերազմից հետո տասնամյակներ շարունակ ռուսական վերահսկողության տակ էր: Երբ երեխա էի, Միացյալ Նահանգներին նայում էի ոչ միայն որպես ամենահզոր, աշխարհի ամենահարուստ երկրի, այլեւ որպես բարի ուժի: Եվ երբ այսօր խոսում եմ իմ լեհ ընկերների հետ, նրանք անհանգստացած են, որ դուք չափից շատ եք մերձենում Պուտինի հետ: Ի՞նչ կասեք համար:

Թրամփ. Դե, եթե ես երկուսի հետ էլ չմերձենայի, դուք երբեք համաձայնագիր չէիք ունենա: Դուք ուզում եք, որ ես սարսափելի բաներ խոսեմ Պուտինի մասին, իսկ հետո ասեմ. «Բարեւ, Վլադիմիր: Ինչպե՞ս են մեր գործերը համաձայնագրի հետ»: Այդպես չի լինում: Ես ոչ մեկի հետ չեմ մերձենում: Ես Միացյալ Նահանգների կողմից եմ, եւ աշխարհի բարօրության համար ես խաղաղության կողմից եմ, եւ ես ուզում եմ վերջ տալ այս ամենին: Այն ատելությունը, որ նա ունի Պուտինի հանդեպ, ինձ համար շատ դժվար է գործարք կնքել այդպիսի ատելությամբ: Նա հսկայական ատելություն ունի, եւ ես դա հասկանում եմ, բայց ես չեմ կարող ասել, որ մյուս կողմը հիացած է նրանով: Այնպես որ, հարցը մերձեցման մեջ չէ:

Ես խաղաղության կողմից եմ: Ես ուզում եմ լուծել այս հարցը: Ես Եվրոպայի կողմից եմ: Ես ուզում եմ տեսնել՝ կարո՞ղ ենք արդյոք մենք դա անել: Դուք ուզում եք, որ ես կոշտ լինե՞մ: Ես կարող եմ ավելի կոշտ լինել, քան ցանկացած մարդ, ում դուք երբեւէ տեսել եք: Բայց դուք երբեք արդյունքի չեք հասնի այդ ձեւով: Ահա թե ինչպես է դա տեղի ունենում: Մեկ հարց էլ:

Վենս. Լսեք, չորս տարի ԱՄՆ-ում մենք ունեինք նախագահ, ով ելույթ էր ունենում մամուլի ասուլիսների ժամանակ եւ կոշտ խոսում Վլադիմիր Պուտինի մասին, իսկ հետո Պուտինը ներխուժեց Ուկրաինա եւ ավերեց երկրի զգալի մասը: Մենք արդեն փորձել ենք Ջո Բայդենի ճանապարհը՝ կուրծք ծեծելով եւ ձեւացնելով, թե ԱՄՆ նախագահի խոսքերն ավելի մեծ նշանակություն ունեն, քան ԱՄՆ նախագահի գործողությունները: Այն, ինչը Ամերիկան լավ երկիր է դարձնում, դա Ամերիկայի մասնակցությունն է դիվանագիտությանը: Հենց դա է անում նախագահ Թրամփը:

Զելենսկի. Կարո՞ղ եմ հարցնել:

Վենս. Իհարկե, այո:

Զելենսկի. Նա (Պուտինը) օկուպացրեց մեր տարածքները, արեւելյան մասը եւ Ղրիմը: Նա օկուպացրեց 2014 թվականին: Ես չեմ խոսում միայն նախագահ Օբամայի, հետո նախագահ Թրամփի, հետո նախագահ Բայդենի, այժմ նախագահ Թրամփի մասին, տա Աստված, որ նախագահ Թրամփը կկանգնեցնի նրան: Բայց 2015 թվականի ընթացքում նրան ոչ ոք չկանգնեցրեց: Նա պարզապես օկուպացրեց եւ վերցրեց: Նա սպանում էր մարդկանց:

Թրամփ. Ես այստեղ չեմ եղել:

Զելենսկի. Այո: Բայց 2014-ից մինչեւ 2022 թվականը: Իրավիճակն այնպիսին է, որ մարդիկ մահանում են շփման գծում: Ոչ ոք նրան չկանգնեցրեց: Դուք գիտեք, որ մենք նրա հետ խոսակցություններ ենք ունեցել, շատ խոսակցություններ, բազմաթիվ երկկողմ խոսակցություններ, եւ մենք ստորագրել ենք նրա հետ... 2019 թվականին ես ստորագրեցի նրա հետ պայմանագիր՝ Մակրոնի եւ Մերկելի հետ, մենք ստորագրեցինք հրադադար: Նրանք բոլորն ասում էին ինձ, որ նա նորից չի գնա: Մենք նրա հետ ստորագրեցինք գազային պայմանագիր, բայց դրանից հետո նա խախտեց հրադադարը: Նա սպանում էր մեր մարդկանց եւ չէր փոխանակում գերիներին: Մենք ստորագրեցինք գերիների փոխանակում, բայց նա դա չարեց: Ի՞նչ դիվանագիտության մասին եք խոսում, Ջեյ Դի: Ի՞նչ նկատի ունեք:

Լուսանկարը` REUTERS

Լուսանկարը` REUTERS

Լուսանկարը` REUTERS

Լուսանկարը` REUTERS