Երեւան: Մեդիամաքս: Երեւանի հանրային տրանսպորտում ներդրված նոր միասնական տոմսային համակարգն ամբողջությամբ կգործարկվի հունվարի 1-ից:

Երեւանի քաղաքապետարանից հայտնել են, որ ուղեւորներին կառաջարկվեն վճարման տարբեր եղանակներ՝ թղթային մեկանգամյա օգտագործման QR code-ով տոմսեր, բջջային հավելված, մշտական օգտագործման ավտոբուսային եւ բանկային քարտեր:

Միասնական համակարգով կգործի նաեւ Երեւանի մետրոպոլիտենը: Տոմսային համակարգի ամբողջական ներդրման ավարտից հետո ժետոնով սպասարկում չի լինի:

«Տրանսպորտային համակարգում վճարման բարեփոխումներին զուգահեռ կավելացվեն նաեւ շարժակազմերը: Երեւանը կունենա 171 նոր ավտոբուս: Երթուղուց դուրս կգան հին եւ մաշված ավտոբուսները»,- ասվում է քաղաքապետարանի հաղորդագրության մեջ:

Մեդիամաքսը հիշեցնում է, որ Երեւանի ավագանին 2024 թվականի մարտի 12-ին ընդունել էր տրանսպորտի նոր ուղեվարձ սահմանելու նախագիծը։

Ուղեւորներին կառաջարկվի երեք տոմսային փաթեթ՝ ամսական, եռամսյակային եւ տարեկան: Ամսական փաթեթը կարժենա 8 800 դրամ, եռամսյակայինը՝ 23 600 դրամ, տարեկանը՝ 88 000 դրամ։

Տրանսպորտից ոչ հաճախ օգտվողների համար կգործի 10-անգամյա ուղեւորության լիցքավորման փաթեթ, որը կարժենա 2 200 դրամ: