Երեւան: Մեդիամաքս: Երեւանում վճարովի ավտոկայանատեղերը կլինեն տարբեր գույների: Կառավարության նիստում այսօր որոշվել է, որ վճարովի ավտոկայանատեղերի զբաղեցրած տարածքի սահմանազատումը կիրականացվի ըստ գոտիավորման:
«Ա» գոտում վճարովի ավտոկայանատեղերը կլինեն կարմիր, իսկ «Բ» գոտում գտնվող վճարովի ավտոկայանատեղերը՝ կապույտ գետնանշմամբ:
Որոշվել է, որ ծառայողական ավտոկայանատեղերի զբաղեցրած տարածքը կառանձնացվի սպիտակ գույնի գետնանշմամբ:
«Ծառայողական ավտոկայանատեղիի զբաղեցրած տարածքի առանձնահատկություններից եւ նպատակահարմարությունից ելնելով՝ կարող է իրականացվել ծառայողական ավտոկայանատեղի զբաղեցրած ամբողջ տարածքի` սպիտակ ներկանյութով, այդ թվում՝ սպիտակ գույնի ասֆալտաբետոնյա կամ այլ ծածկույթներով սահմանազատում»,- ասվում է որոշման մեջ:
Էլեկտրամոբիլների լիցքավորման ապահովման համար վճարովի ավտոկայանատեղերի զբաղեցրած տարածքը կառանձնացվի կանաչ գույնի գետնանշմամբ:
Նշվում է, որ այդկերպ վարորդները կկարողանան գետնանշման գունային տարբերությամբ հեշտությամբ միմյանցից տարբերակել ծառայողական ավտոկայանատեղերը, այլ վճարովի ավտոկայանատեղերը, այդ թվում՝ էլեկտրամոբիլների լիցքավորման կայաններից էլեկտրամոբիլների լիցքավորման ապահովման հնարավորությամբ կազմակերպված վճարովի ավտոկայանատեղերը:
