Երեւան: Մեդիամաքս: Նախքան Երեւանի Օղակաձեւ զբոսայգու 4-րդ հատվածի բարեկարգման վերջնական նախագիծ ունենալը Green Rock Management Group ընկերությունը պատրաստվում է կազմակերպել հանրային քննարկումներ:

Այդ մասին Banks.am-ին տված հարցազրույցում ասել է Green Rock Management Group ընկերության տնօրեն Վարազդատ Ներսիսյանը:

«Անդրադառնալով Օղակաձեւ զբոսայգու 4-րդ հատվածի բարեկարգման նախագծի շուրջ ծավալված քննարկումներին՝ հարկ եմ համարում նշել, որպես համայնքի ներգրավվածության մեր շարունակական հանձնառության մաս՝ մեր կողմից արդեն իսկ իրականացվել է քաղաքացիների ցանկությունների առաջնային ուսումնասիրություն, եւ մինչ վերջնական նախագիծ ունենալը մենք պատրաստվում ենք կազմակերպել հանրային քննարկումներ՝ հավաքագրելու հանրության պատկերացումները տարածքի մասին եւ առանձնացնելու այգու վերականգնման համար առավել ցանկալի տարբերակները:

Կարեւոր է նշել, որ O4 Green Urban Hub նախագծի իրականացումը դեռ քննարկման փուլում է Երեւանի քաղաքապետարանի հետ, եւ պաշտոնական համաձայնություն դեռեւս ձեռք չի բերվել։ Այնուամենայնիվ, երբ վերջնական համաձայնություն ձեռք բերվի, մենք կփորձենք ապահովել համայնքի ներգրավվածությունը այս նախագծի բոլոր փուլերում:

Մենք համոզված ենք, որ համայնքի հետ բաց եւ թափանցիկ հաղորդակցությունը վճռորոշ է ցանկացած նախագծի հաջողության համար: Green Rock Management Group-ը լիովին հանձնառու է պահպանել այս սկզբունքը եւ ստեղծել այնպիսի նախագծեր, որոնք ոչ միայն կհամապատասխանեն միջազգային չափանիշներին, այլեւ կծառայեն համայնքների կարիքներին եւ ցանկություններին», - ասել է Վարազդատ Ներսիսյանը: