«Գծատերեր» հասկացությունը կվերանա, ասել է փոխքաղաքապետը - Mediamax.am

18440 դիտում

«Գծատերեր» հասկացությունը կվերանա, ասել է փոխքաղաքապետը


Լուսանկարը` Երեւանի քաղաքապետարանի մամուլի ծառայություն

Լուսանկարը` Երեւանի քաղաքապետարանի մամուլի ծառայություն


Երեւան: Մեդիամաքս: Երեւանի քաղաքապետի տեղակալ Վահե Նիկոյանն այսօր ասել է, որ քաղաքային տրանսպորտի համակարգում «գծատերեր» հասկացությունը պետք է վերանա։

«Կարծում եմ՝ ոլորտը կարգավորելու համար մենք պետք է ստեղծենք կառավարման հստակ մեխանիզմ եւ սահմանենք մասնագիտական չափորոշիչներ։ Փոխլրացման սկզբունքով միասնական կառավարման համակարգ պետք է ներդրվի, որը բարձր տեխնիկական պահանջներ կունենա թե՛ ավտոպարկի եւ թե՛ մարդկային ռեսուրսների նկատմամբ։ Հարկ եմ համարում նշել, որ մեր կողմից առաջադրված պահանջների շրջանակում է նաեւ այն, որ Երեւան քաղաքի հանրային տրանսպորտի սակագինը շարունակի հասանելի մնալ մեր բնակիչների համար»,- ասել է Վահե Նիկոյանը Երեւան քաղաքի հասարակական տրանսպորտի համակարգի բարեփոխումների աշխատանքային խմբի հանդիպմանը:

 

Փոխքաղաքապետը տեղեկացրել է, որ կատարվել է հասարակական տրանսպորտի ամբողջ համակարգի օպտիմալացման հնարավորությունների եւ իրագործելիության գնահատում։ Օպտիմալացումը ենթադրում է նոր երթուղային ցանցի մոդելավորում, միասնական էլեկտրոնային տոմսային համակարգի ներդրում եւ կառավարման համակարգի նոր չափորոշիչների սահմանում։

 

«Մեր առջեւ խնդիր է դրված ամբողջական համակարգային փոփոխության ենթարկել հանրային տրանսպորտի ոլորտը եւ Երեւանի բնակիչների համար ստեղծել քաղաքում տեղաշարժվելու համար արժանապատիվ պայմաններ»,- ամփոփել է Վահե Նիկոյանը:

 

Ներկայացված զեկույցի շուրջ աշխատանքային խմբի անդամները մեկ ամսվա ընթացքում կներկայացնեն իրենց դիտարկումներն ու առաջարկները։ Դրանց հիման վրա խորհրդատու կազմակերպության կողմից կմշակվի բարեփոխումների նախագիծ, որն էլ կներկայացվի հանրային քննարկման։ Հավանության արժանանալու դեպքում այն Երեւանի քաղաքապետարանի կողմից կյանքի կկոչվի։ Գործընթացում կներգրավվեն տեղական եւ միջազգային ներդրողներ։

Կարծիքներ

Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում:




Մեր ընտրանին