Երեւան: Մեդիամաքս: Հայաստանի Ճարտարապետների միության նախագահ Մկրտիչ Մինասյանն այսօր Մեդիամաքս-ին ասել է, որ Երեւանի գլխավոր ճարտարապետ Միքայել Հասրաթյանի հրաժարականի պատճառը վերջինիս "սկզբունքային մարդ” լինելն է:
“Ես ճանաչում եմ Միքայել Հասրաթյանին, նա սկզբունքային մարդ է: Կարծում եմ, որ հրաժարականը կապված է այն հանգամանքի հետ, որ շատ կարեւոր հարցերի շուրջ ընդհանուր հայտարարի չեն եկել”, - ասել է Մկրտիչ Մինասյանը:
Երեւանյան թերթերն այսօր գրում են, որ Երեւանի գլխավոր ճարտարապետ Միքայել Հասրաթյանը հրաժարական է տվել: Երեւանի քաղաքապետարանն այս կապակցությամբ դեռեւս պաշտոնական մեկնաբանություններ չի արել:
Թերթերի հաղորդման համաձայն, Միքայել Հասրաթյանի հրաժարականի հիմնական պատճառը նրա անհամաձայնությունն է Երեւանում իրականացվելիք մի շարք քաղաքաշինական նախագծերի հետ, որոնց հեղինակը Հայաստանի ներկայիս գլխավոր ճարտարապետ եւ քաղաքաշինության փոխնախարար Նարեկ Սարգսյանն է:
Տեղեկություններ կան այն մասին, որ հենց Նարեկ Սարգսյանն է դառնալու Երեւանի նոր գլխավոր ճարտարապետ:
