Նա լուսանկարել է Ուինսթոն Չերչիլին, Ինդիրա Գանդիին, Մարիա Կալասին, Ալֆրեդ Հիչքոքին, Սոֆի Լորենին, Մարկ Շագալին, Սալվադոր Դալիին, Պաբլո Պիկասոյին: Նրա լուսանկարները տպագրվել են այնպիսի պարբերականների էջերին, ինչպիսիք են Time-ը, Life-ը, Newsweek-ը:

Ծննդավայր Թուրքիայում նրան անվանում են «Ստամբուլի աչք» կամ «Ստամբուլի լուսանկարիչ», մինչդեռ նա իրեն համարում է «վիզուալ պատմաբան»՝ խոստովանելով, որ չափազանց կարեւորում է մարդու ներկայությունը կադրում:

Նա XX դարի երկրորդ կեսի ամենահայտնի լուսանկարիչներից է՝ աշխարհահռչակ Արա Գյուլերը:

2013 թվականի հունիսին Հայաստանի Ազգային պատկերասրահում «Բարև ձեզ» ցուցահանդեսի համար Արա Գյուլերը Ստամբուլից բերել էր ավելի քան 130 լուսանկար, որոնք արվել էին տարբեր ժամանակներում` աշխարհի տարբեր անկյուններում:

Արա Գյուլերը:

Լուսանկարը` ՀՀ մշակույթի նախարարության:

«Հայաստան առաջին անգամ չէ, որ կուգամ: Չորրորդ անգամն է: Ամեն եկած ատենս տակավին քոմունիսթ էին: Առաջին անգամն է, որ քոմունիսթի վերջեն կուգամ», - ասում է նա:

Արա Գյուլերը մերժում է լուսանկարչության մեջ ժամանակակից տեխնոլոգիաների կիրառումը, հատկապես դեմ է «ֆոտոշոփի» կիրառմանը:

«Իրականությունն ինչպես կա» մոտեցման կողմնակից Արա Գյուլերը գտնում է, որ  ժամանակակից լուսանկարիչները, արհեստական էֆեկտներն օգտագործելով, խաբում են դիտողին: «Բնութեան մեջ չիկան լուսեր, դուն ան լուսերը կդնես ու սուտ կխոսիս: Իրականությունն ան չէր»: 

Արա Գյուլերի լուսանկարը:

Լուսանկարիչն ասում է, որ պետք է հստակ բաժանել ֆոտոլրագրությունն ու արթ-լուսանկարչությունը:

«Ամեն բան որ կընես, պրոդուքսիոն մը ըրած կըլլաս: Անոր մեջ երբ որ հոգի կը դընես, նայողին ան բան մը գըսե, ան ատեն արտ-ֆոտոգրաֆի կըլլա»:

Արա Գյուլերը համոզված է, որ լուսանկարչության մեջ, ինչպես ամեն տեղ, առանցքային նշանակություն ունի մարդը, անհատը:

«Առանց մարդու փերսոնալիթեի ռեակցիա չի կրնա ըլլար»:

Արամ Խաչատրյանին լուսանկարելու պատմությունը Արա Գյուլերը հիշում է ջերմ ծիծաղով: Նա պատմում է, որ Խաչատրյանին լուսանկարում էր կոմպոզիտորի մոսկովյան բնակարանում:

Հայազգի կոմպոզիտորը բավականին լարված էր նստել լուսանկարչի առջեւ, արհեսատական կեցվածք ընդունել: «Մարդը հազար ու մի մոդել կընե: Ես ադանք պատկեր չեմ քաշեր»,- ասում է Գյուլերը:  

Լարվածության մթնոլորտն ավելի էր թեժացնում այն հանգամանքը, որ չէին կարող շփվել մեկ լեզվով՝ Գյուլերը խոսում էր արեւմտահայերեն, Խաչատրյանը՝ռուսերեն:

Արամ Խաչատրյանի դիմանկարը, հեղինակ`Արա Գյուլեր:

Կոմպոզիտորին լարվածությունից հանելու համար Գյուլերը որոշում է մի փոքր դադար վերցնել: Ժամանակ շահելու համար լուսանկարիչը որոշում է փոխել լույսերի դիրքը: Տեղափոխում է լույսերը, մոտեցնում էլեկտրական վարդակին եւ բարձր լարման տակ գտնվող լույսերը փորձում միացնել վարդակին:

«Ամբողջ շենքի լուսերը գնացին: Հիմա մենք Խաչատուրյանի հետ մնացել ենք մութին մեջ: Արամ Խաչատուրյանը մեկ բառ չիդե, ռուսերեն ուրիշ լեզու չիդե: Հիմա ինչերե՞ն պիտի խոսենք մարդու հետ, մթին մեջ ենք մնացել երկուքս»,- պատմում է Գյուլերը:

Արա Գյուլերի հետ զրուցել է Եկատերինա Պողոսյանը: