Սերգեյ Փարաջանովը համարում էր նրան «իրական կինեմատոգրաֆիայի սակավաթիվ հանճարներից մեկը»: Նրանով հիանում են Անդրեյ Կոնչալովսկին եւ Ժան-Լյուկ Գոդարը: Ռուս կինոքննադատ Օլեգ Առոնսոնը նշում է, որ «դեռ 70-կաններին նա արդեն համարվում էր համաշխարհային կինեմատոգրաֆիայի դասական»: Նա այսպես կոչված «դիստանցիոն մոնտաժի» տեսության ստեղծողն է: Այս ամենը վավերագրական կինոյի կենդանի դասական Արտավազդ Փելեշյանի մասին է:

Երեկ համաշխարհային ճանաչում ունեցող ռեժիսորը վարպետության դաս է անցկացրել Երեւանի թատրոնի եւ կինոյի ինստիտուտի ուսանողների համար:

Մեդիամաքս-ը առանձնացրել է Արտավազդ Փելեշյանի մտքերից մի քանիսը:

Ինչպես որոշեցի դառնալ ռեժիսոր

«Ավտոմատիկա» գործարանում էինք աշխատում: Գնում էինք կոլեկտիվով ֆիլմեր դիտելու: Ֆիլմից հետո սկսում էինք քննարկել տեսածը եւ իմ տեսակետը որեւէ մեկին դուր չեր գալիս, քանի որ այն միշտ տարբերվում էր մնացած կարծիքներից: Այդպես որոշեցի դառնալ կինոռեժիսոր, որպեսզի նման խոսակցություններ այլեւս չլինեն:

Կինոյի մասին

Կինոն համարում են սինթետիկ արվեստ, բայց ես համամիտ չեմ այդ կարծիքին: Կինոն չի խմում ո՛չ գրականության, ո՛չ երաժշտության, ո՛չ կերպարվեստի ջրերը, կինոն խմում է ջուրը այնտեղից, որտեղից խմում են առանձին վերցրած եւ՛ գրականությունը,  եւ՛ կերպարվեստը, եւ՛ երաժշտությունը:

Երաժշտության մասին

Երաժշտությունը բառ չէ, ես չեմ մոնտաժում պատկերն ու երաժշտությունը, ես մոնտաժ եմ անում պատկերի զգացմունքը երաժշտության զգացմունքի հետ, իսկ դրանք տարբեր են:

Արտավազդ Փելեշյան: Լուսանկարը` Photolure

Իմ ոճի մասին

«Տարվա եղանակներում» օպերատորը տեսախցիկն է բռնում, իսկ ես` օպերատորին:

Կրկին ոճի մասին

Իմ ֆիլմերում ես օգտագործում եմ ուրիշ մոտեցում` ինձ պատկերի միացումը չի հետաքրքրում, ինձ հետաքրքրում է դրանք իրարից բաժանելը, հեռավորության վրա դնելը:

Հեռավորության վրա գտնվող լիցքավորվող պատկերներն իրար մեջ ավելի ուժեղ են խոսում եւ ոչ միայն իրար մեջ են խոսում, այլ դրանք խոսում են մեջտեղում ընկած բոլոր պատկերների հետ. դա է մեխանիզմը:

Իմ ֆիլմերի մեջ սխալներ կան: Հենց այդ պատճառով էլ նրանք երկար են ապրում: 

Սիրած ֆիլմերի մասին

Սիրում եմ ամերիկյան, ռուսական եւ չինական կինեմատոգրաֆիան: Ֆրենսիս Ֆորդ Կոպոլայի «Կնքահայր»-ը, Սերգեյ Գերասիմովի «Խաղաղ Դոն»-ը եւ Չինգի «Չինական ուրվականների պատմությունը» գլխավորում են իմ սիրած կինոների ցանկը:

Այսօրվա հետաքրքրությունների մասին

Նորից կյանքն է հետաքրքրում՝ եւ այսօրվա, եւ վաղվա, եւ մյուս տարիների համար… ուրիշ էլ ի՞նչը պետք է հետաքրքրի:

Արտավազդ Փելեշյան: Լուսանկարը` Photolure

Խորհուրդ երիտասարդներին

Մի վախեցեք ոչ մի բանից, իսկ առաջին ֆիլմի մեջ ներդրեք ամեն ինչ, դա՛ է որոշելու ձեր ապագան:

Ապագա անելիքների մասին

“Homo sapiens” խաղարկային ֆիլմի սցենարը պատրաստ էր դեռ Սովետական Միության տարիներին: 1989թ. այդ ֆիլմի սցենարը ստացավ պետական պատվեր, սակայն երկրի փլուզման պատճառով այդպես էլ կյանքի չկոչվեց: Եթե հաջողվի այդ ֆիլմը նկարահանել, իմ մնացած գործերը պստիկ էսքիզներ կթվան “Homo Sapiens”-ի համեմատ:

Պատրաստեց Արամ Արարատյանը: