Երեւան, Մեդիամաքս: Ռուս ուղղափառ եկեղեցու ղեկավարությունն ուրախ է, որ Մոսկվայում նոր հայկական եկեղեցու շինարարությունը մոտենում է ավարտին:
Ինչպես հաղորդում է Մեդիամաքսը, վկայակոչելով ՌԴ Ազգային նորությունների գործակալությունը, այդ մասին ասել է Մոսկվայի Պատրիարքարանի արտաքին եկեղեցական կապերի բաժնի նախագահ, Վոլոկոլամսկի արքեպիսկոպոս Իլարիոնը Մոսկվայում հայ համայնքի ներկայացուցիչների հետ հանդիպման ընթացքում:
Նա հատուկ ընդգծել է, որ Հայաստանը առաջին երկիրն է, որն ընդունել է քրիստոնեությունը:
«Դա տեղի է ունեցել 301 թվականին, եւ այդ պահից Սուրբ Գրիգոր Լուսավորչի քարոզչության շնորհիվ, ում փառաբանում է ամբողջ քրիստոնեական աշխարհը, սկսվել է Հայաստանի քրիստոնեական պատմությունը, որը շարունակվում է մինչ օրս, չնայած բազմաթիվ փորձություններին, որոնք բաժին են ընկել հայ ժողովրդին»,- ասել է միտրոպոլիտ Իլարիոնը:
“Հայ ազգը մարտիրոս է, քանի որ հայերը տանջվել են, նախեւառաջ, իրենց քրիստոնեական հավատքի համար”,- ասել է արքեպիսկոպոս Իլարիոնը: “Եվ, չնայած բազմաթիվ փորձություններին, որոնք դարերի ընթացքում խլել են միլիոնավոր կյանքեր, հայ ժողովուրդը ամուր է պահել եւ շարունակում է պահպանել իր հավատքը”:
«Այսօր շատ հայեր ապրում են Ամերիկայում, Արեւմտյան Եվրոպայի երկրներում, սակայն հայտնի է, որ հայկական սփյուռքի ամենամեծ մասն ապրում է Ռուսաստանում, եւ հենց Ռուսաստանն է ապաստան տվել ամենամեծ թվով հայերի, ովքեր տարբեր տարիներին ստիպված են եղել տեղափոխվել իրենց հարազատ հողից»,- նշել է Մոսկվայի Պատրիարքարանի արտաքին եկեղեցական կապերի բաժնի նախագահը:
«Շատ բնական է, որ հայ ճարտարապետների ձեռքերով այստեղ կառուցվում է Հայ առաքելական եկեղեցու տաճարը: Մենք հետեւում ենք այդ շինարարությանը, ուրախանում, որ այն մոտենում է ավարտին, եւ շուտով հայ համայնքն այստեղ կունենա իր հոգեւոր տունը, որը ձգողության կենտրոն կդառնա Հայ առաքելական եկեղեցու բազմաթիվ հետեւորդների եւ հայկական սփյուռքի ներկայացուցիչների համար»,- ասել է արքեպիսկոպոս Իլարիոնը:
