Երեւան: Մեդիամաքս: Սիրիայի հայ համայնքի ներկայացուցիչ, Արաբ գրողների միության անդամ Նորա Արիսսյան այսօր Մեդիամաքս-ին ասել է, որ այս գիշեր պայթյուն է գրանցվել Դամասկոսի Մեզզեյ թաղամասում, որտեղ գտնվում է ՀՀ դեսպանատունը:
ՀՀ ԱԳՆ մամլո խոսնակ Տիգրան Բալայանը Մեդիամաքս-ին հայտնել է, որ մանրամասները ճշտվում են:
Մարտի 18-ին Հալեպում տեղի ունեցած պայթյունի հետեւանքով զոհվել է հայազգի Արաքս Պետրոսյանը, վիրավորվել են Սիրայի 5 հայազգի քաղաքացիներ:
Ս.թ. փետրվարին Մեդիամաքս-ին տված հարցազրույցում սիրիական ընդդիմության ներկայացուցիչներից մեկը, գրող եւ հրապարակախոս Յասին Ալ Հաջ Սալեհն ասել էր, որ Սիրիայի հայերին վտանգի չի սպառնում:
“Չեմ հասկանում, թե ինչու է առաջացել այն մտավախությունը, թե նրանք ճնշումների կենթարկվեն: Սա, կարծում եմ, ավելորդ անհանգստություն է: Որեւէ մեկը հայերին որեւէ բանում չի մեղադրում… Համենայն դեպս, ես նման բան չեմ լսել: Հայերն ապրում են այստեղ Առաջին համաշխարհային պատերազմից հետո: Նրանք լիովին ինտեգրված են սիրիական հասարակությանը եւ նրա մի մասն են կազմում”, - ասել էր նա:
Նորա Արիսսյանն ասել է, որ այսօր Հալեպում տեղի է ունեցել Արաքս Պետրոսյանի հուղարկավորությունը:
“Վիրավորները մեկ ընտանիքի անդամներ են, որոնք բնակվել են պայթյունին մոտ գտնվող շենքում”,- նշել է Նորա Արիսսյանը:
Նրա խոսքով, մտահոգություն է առաջացնում այն, որ պայթյունը տեղի է ունեցել քրիստոնեական թաղամասում, որի մեջ է մտնում նաեւ հայկական թաղամասը:
“Պայթյունը եղել է այն ժամին, երբ հայկական վարժարաններից երեխաները տուն էին գնում”,- ասել է Արիսսյանը:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: