Երեւան: Մեդիամաքս: Ամերիկյան Կոլորադո նահանգում անցկացվող ամենամյա Telluride միջազգային կինոփառատոնում ցուցադրվել է Սերգեյ Փարաջանովի «Հակոբ Հովնաթանյան» (1967թ․) 10-րոպեանոց կարճամետրաժ ֆիլմի վերականգնված տարբերակը:
Հայաստանի Ազգային կինոկենտրոնից հայտնում են, որ «Հակոբ Հովնաթանյանը» առաջին ֆիլմն է, որը վերականգնվել է «Համո Բեկնազարյան» ֆիլմերի վերականգնման նախագծի շրջանակներում։
Հայաստանի Ազգային կինոկենտրոնի, Fixafilm ընկերության եւ KinoKlassika հիմնադրամի (Լոնդոն) կողմից իրականցվող հայկական ֆիլմերի վերականգնման ծրագրով նախատեսվում է վերկանգնել Համո Բեկնազարյանի 10 ֆիլմերը, ինչպես նաեւ մի շարք հայկական դասական ֆիլմեր։
2018թ. հունիսին ֆիլմի ժապավենը տեղափոխել է Վարշավա, որտեղ Fixafilm ընկերությունում սկսվել են ֆիլմի վերականգնման աշխատանքները։ Fixafilm-ի աշխատակիցները ֆիլմը վերականգնելու ընթացքում մշտապես համագործակցել են հայ մասնագետների հետ։
Ստորեւ ներկայացվող տեսանյութում կարելի է հետեւել «Հակոբ Հովնաթանյանը» ֆիլմի վերականգման ընթացքին.
«Հակոբ Հովնաթանյան» վավերագրական ֆիլմը նվիրված է 18-րդ դարի կեսերին Թիֆլիսում ապրած նկարչի ստեղծագործությանը, որը միջնադարից սերող հայկական հայտնի նկարչական տոհմի ամենանշանավոր ներկայացուցիչն է:
