Երեւան: Մեդիամաքս: ԱՄՆ-ում հրատարակվել է Մասաչուսեթսի տեխնոլոգիական ինստիտուտի (MIT) դասախոս, պատմաբան Լեռնա Էկմեկչիօղլուի «Հայաստանի վերականգնումը. Պատկանելիության սահմանափակումները Թուրքիայում ցեղասպանությունից հետո» գիրքը:
Սթենֆորդի համալսարանի կողմից հրատարակված գիրքը հեղինակի խորքային հետազոտությունն է Հայոց ցեղասպանության հետեւանքների եւ դրանից հետո Թուրքիայում մնացած հայերի մասին:
Հեղինակն անդրադառնում է Առաջին աշխարհամարտից հետո Թուրքիայում հայերի վիճակին՝ նկարագրելով, թե ինչպես են այդ երկրում հայերին վերաբերում որպես դավաճանների:
Աշխատության մեջ հեղինակը պատմում է այդ ժամանակաշրջանի Թուրքիայում հայկական շրջանակների հանրային գործիչների մասին, ինչպես Ստամբուլում տպագրվող «Հայ կին» ամսագրի խմբագիր Հայկանուշ Մարկն է: Նա մարմնավորում է հայ կնոջ կերպարը, որը բարդ ժամանակաշրջանում առանցքային դեր է խաղում հայ մշակույթի, ինքնության եւ ավանդույթների պահպանման գործում:
Լեռնա Էկմեկչիօղլուն դստրերի հետ
Հայկանուշ Մարկը հանդես էր գալիս նաեւ ի պաշտպանություն կանանց իրավունքների: Այսպիսով, հեղինակը փորձել է ներկայացնել այդ ժամանակաշրջանում հայ կանանց դերակատարումը Թուրքիայում հայկական ինքնության պահպանման գործում:
Լինելով ազգությամբ հայ՝ Լեռնա Էկմեկչիօղլուն ընդգծում է, որ ներկայիս Թուրքիայում իր պես բազմաթիվ հայերին չեն թույլատրում դասավանդել դպրոցներում՝ ազգային պատկանելիության պատճառով:
«Այն պատմությունը, որն ինձ դասավանդել են դպրոցում, ամբողջությամբ հակասում էր այն պատմությանը, որի մասին ինձ պատմում էին տանը: Ես մեծացել եմ մի ընտանիքում, որտեղ խոսում էին այդ դեպքերի մասին եւ ջանքեր գործադրում՝ արթուն պահելու մեր հիշողությունը»,- նշում է հեղինակը:
Հեղինակը նաեւ ասել է, որ Հայոց ցեղասպանության 100-ամյակից հետո Թուրքիայում աննախադեպ քննարկումներ են ծավալվում կատարվածի եւ այդ երկրում հայերի ներկայության մասին:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: