Երեւան: Մեդիամաքս: 85 տարեկանում մահացել է իտալացի գրող եւ փիլիսոփա Ումբերտո Էկոն:

Նրա մահվան մասին La Repubblica թերթին տեղեկացրել են գրողի հարազատները:

Ումբերտո Էկոն համարվում էր մեր ժամանակների մեծագույն գրողներից եւ մտածողներից մեկը:

Նրա ամենահայտնի վեպը «Վարդի անունն է», որը 2014 թվականին հրատարակվեց հայերեն՝ Զավեն Բոյաջյանի թարգմանությամբ:

2015 թվականին «Անտարես» հրատարակչությունը հայերեն հրատարակեց Ժան-Կլոդ Կարիերի եւ Ումբերտո Էկոյի «Հույս չունենաք, թե կազատվեք գրքերից» (N'espérez pas vous débarrasser des livres) զրույցների ժողովածուն, որը ֆրանսերենից թարգմանել էր Սարգիս Դավթյանը: Մեդիամաքսը ներկայացրել է գիրքը «Գրքերի տաղավար խորագրում»:

Ներկայացնում ենք Ումբերտո Էկոյի մի քանի մտքեր՝ նրա ստեղծագործություններից եւ գրքերից.

«Մարդիկ հոգնել են պարզ բաներից: Նրանք ցանկանում են զարմացած լինել»:

«Վախկոտ մարդուն խիզախություն է պարգեւում այլոց վախը»:

«Միշտ կարծել եմ, որ լավ գիրքը իր հեղինակից խելացի է: Այն կարող է պատմել այնպիսի բաներ, որոնց մասին հեղինակն անգամ տեղյակ չէ»:

«Քանի որ հնարած միջավայրը բնականից շատ ավելի հարմարավետ է, մենք փորձում ենք կյանքը կարդալ այնպես, իբրեւ թե այն եւս գրական ստեղծագործություն է»:

«Յուրաքանչյուր գրող, նկարիչ, երաժիշտ եւ գիտնական ցանկանում է, որ իր աշխատանքն ապրի իր մահվանից հետո: Այլապես նրանք հիմարներ կլինեին»: