Երեւան: Մեդիամաքս: Դուբնայի միջուկային հետազոտությունների միացյալ ինստիտուտի Ֆլյորովի անվան միջուկային ռեակտորների լաբորատորիայի գիտական ղեկավար, ՌԴ գիտությունների ակադեմիայի ակադեմիկոս Յուրի Օգանեսովին շնորհվել է Հայաստանի քաղաքացիություն:
Հուլիսի 10-ին ընդունելով անվանի գիտնականին, Հայաստանի վարչապետ Նիկոլ Փաշինյանն ասել է.
«Անակնկալ ունեմ Ձեզ համար, երեկ ստորագրել եմ Ձեզ ՀՀ քաղաքացիություն շնորհելու մասին միջնորդությունը: Ուրախ եմ, որ Հայաստանի Հանրապետությունը դե յուրե Ձեզ նման քաղաքացի է ունենալու, որովհետեւ համարում եմ, որ դե ֆակտո Դուք վաղուցվանից եք ՀՀ քաղաքացի»:
Յուրի Օգանեսովը շնորհակալություն է հայտնել Նիկոլ Փաշինյանին իրեն ՀՀ քաղաքացիություն շնորհելու համար: Նա տեղեկացրել է, որ կրթության եւ գիտության եւ առողջապահության նախարարների հետ քննարկել Ռադիոիզոտոպների արտադրության կենտրոնի գործարկման ընթացքը:
