Երեւան: Մեդիամաքս: Թուրքական Baykar կոնցեռնը հայտարարել է Ադրբեջանում Bayraktar Teknoloji Azerbaycan ընկերության հիմնադրման մասին:

Ընկերությունը կզբաղվի անօդաչու թռչող սարքերի արտադրությամբ, դրանց տեխնիկական սպասարկմամբ եւ վերանորոգմամբ, տեղացի մասնագետների վերապատրաստմամբ:

Ընկերության տնօրեն Սելջուկ Բայրաքթարը, որը եւ Թուրքիայի նախագահի փեսան է, ասել է.

«Bayraktar Teknoloji-ն հիմնել ենք սիրելի Ադրբեջանում: Մենք միասին աշխատում ենք եղբայրության եւ լիակատար տեխնոլոգիական անկախության համար»:

2025 թվականի մայիսին ընկերությունը ստացել է Սումգայիթի քիմիական- արդյունաբերական պարկի ռեզիդենտի պաշտոնական կարգավիճակ, որտեղ կկառուցվի Baykar-ի առաջին արտադրական կենտրոնը Թուրքիայի սահմաններից դուրս: Այստեղ նախատեսվում է Bayraktar TB2 եւ Akıncı անօդաչուների հավաքում կազմակերպել՝ տեղացի անձնակազմի մասնակցությամբ:

2025 թվականի մարտի դրությամբ ընկերությունը վարձել էր ավելի քան 200 ինժեներների եւ տեխնիկների, եւ սպասվում է, որ աշխատակիցների թիվն աճելու է։