Սեպտեմբերի 20-ին ՀՀ վարչապետ Նիկոլ Փաշինյանը Երեւանում ընդունել է ԱՄՆ պետքարտուղարի փոխտեղակալ Ջոշուա Հաքի գլխավորած պատվիրակությանը:
Կառավարությունից հայտնում են, որ հանդիպմանը, մասնավորապես, «քննարկվել են Հայաստանի եւ Ադրբեջանի միջեւ խաղաղության պայմանագրի շուրջ քննարկումներին, ՀՀ կառավարության «Խաղաղության խաչմերուկ» նախագծին վերաբերող հարցեր»:
«Այս համատեքստում, վարչապետ Փաշինյանն անդրադարձել է հայկական կողմի սկզբունքային դիրքորոշումներին եւ ընդգծել, որ Հայաստանը հավատարիմ է խաղաղության օրակարգին ու տարածաշրջանում կայունության ապահովմանը», - ասված է հաղորդագրության մեջ:
Կառավարության մամուլի ծառայության տրամադրած լուսանկարներից երեւում է, որ նախքան հանդիպման մեկնարկը ԱՄՆ պատվիրակության անդամները զբաղված են եղել «Խաղաղության խաչմերուկ» նախագծի բուկլետների ուսումնասիրությամբ:
Այս լուսանկարում Հայաստանում ԱՄՆ դեսպան Քրիստինա Քվինը Ջոշուա Հաքին ինչ-որ բան է ցույց տալիս բուկլետում:
Լուսանկարը` ՀՀ կառավարություն
Այնուհետեւ նրանց է միանում ամերիկյան պատվիրակության անդամներից մեկը:
Լուսանկարը` ՀՀ կառավարություն
Իսկ այս լուսանկարում բուկլետի ուսումնասիրությանը միանում է ԱՄՆ Կովկասյան բանակցությունների հարցերով ավագ խորհրդական Լուի Բոնոն եւ ինչ-որ բան է մատնացույց անում:
Լուսանկարը` ՀՀ կառավարություն
Մեդիամաքսը հիշեցնում է, որ ս.թ. հուլիսին ԱՄՆ պետքարտուղարի օգնական Ջեյմս Օ'Բրայենը հայտարարել էր, որ եթե ԱՄՆ-ն «կարողանա առեւտրային ուղի բացել Ադրբեջանի եւ Հայաստանի տարածքով, Կենտրոնական Ասիայի երկրները մուտք կունենան դեպի համաշխարհային շուկաներ եւ կնվազեցնեն կախվածությունը Ռուսաստանից եւ Չինաստանից»:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: