Երեւան: Մեդիամաքս: Վարչապետ Նիկոլ Փաշինյանն այսօր ասել է, որ «խաղաղության համաձայնագրի համաձայնեցված մասում նախատեսվում է դրույթ Հայաստանի եւ Ադրբեջանի միջեւ դիվանագիտական հարաբերություններ հաստատելու վերաբերյալ»:
«Առաջարկում ենք վերցնել այն, ինչ այս պահին համաձայնեցված է, ստորագրել, ունենալ մի հիմնարար փաստաթուղթ, որից հետո շարունակել քննարկումները մնացած հարցերի վերաբերյալ:
Շատ կարեւոր է դնել այն հիմքը կամ չմերժել այն հիմքը, որն արդեն դրված է մի քանի տարվա բանակցությունների արդյունքում: Հույս ունեմ, որ մենք առաջիկայում առիթ կունենանք ստորագրել խաղաղության պայմանագրի համաձայնեցված մասը եւ անցնել մնացած բանակցություններին՝ հետագա հարցերը լուծելու համար: Չկան երկրներ, որոնց հարաբերությունները կարգավորվում են մեկ պայմանագրով»,- «Երեւանյան երկխոսություն» համաժողովի բացմանն ասել է Նիկոլ Փաշինյանը:
Միաժամանակ, նա նշել է, որ «Հայաստանի սահմանադրության մեջ չկա ոչինչ, ինչ վերագրվում է»:
«Սակայն մենք տեսնում ենք, որ Ադրբեջանի Սահմանադրության մեջ կան տարածքային պահանջներ Հայաստանի նկատմամբ, սակայն այդ հարցը չենք բարձրացնում՝ խաղաղության գործընթացը փակուղի չմտցնելու համար», - ասել է Նիկոլ Փաշինյանը:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: