Երեւան: Մեդիամաքս: Հայաստանը, հանդիսանալով Հավաքական անվտանգության պայմանագրի կազմակերպության (ՀԱՊԿ) անդամ, շարունակելու է գործընկերությունը ՆԱՏՕ-ի հետ` հանդես է գալով «համագործակցությունների համադրման դիրքերից»:
Ինչպես հաղորդում է Մեդիամաքս-ը, այս մասին այսօր Երեւանում հայտարարել է ՀՀ Ազգային անվտանգության խորհրդի քարտուղար Արթուր Բաղդասարյանը` ելույթ ունենալով միջազգային համաժողովում:
«Լինելով ՀԱՊԿ առանցքային անդամներից մեկը, մենք շարունակում ենք գործընկերությունը ՆԱՏՕ-ի հետ հստակ նախանշված օրակարգով: Մենք գտնում ենք, որ այստեղ կա համադրման ներուժ եւ դրանով պետք է առաջ շարժվել: Համագործակցությունների հակադրումը կարող է միայն բացասական հետեւանքների բերել»,- ասել է Արթուր Բաղդասարյանը:
Նրա խոսքերով, Հայաստան-ՆԱՏՕ համագործակցությունը ունի զարգացման եւ ամրապնդման հեռանկարներ, ինչի մասին վկայում են ՀՀ-ՆԱՏՕ Անհատական գործընկերության 2014-2015 թթ. գործողությունների ծրագրով նախատեսված միջոցառումները:
Արթուր Բաղդասարյանն առանձնակի կարեւորել է կիբերանվտանգության եւ կիբերահաբեկչության դեմ պայքարի շրջանակներում նախատեսված ծրագրերը:
ԱԱԽ քարտուղարը կարեւորել է նաեւ Հայաստանի Զինված ուժերի ակտիվ ներգրավվածությունը ՆԱՏՕ-ի խաղաղապահ գործողություններին:
«Հայաստանը տարածաշրջանային եւ միջազգային անվտանգությանն ու կայունությանն ուղղված ջանքերին աջակցող երկիր է: Մենք հատկապես կարեւորում ենք մեր Զինված ուժերի մասնակցությունը Աֆղանստանում ISAF առաքելությանը»,- ասել է Արթուր Բաղդասարյանը:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: