Երեւան: Մեդիամաքս: ՀԱԿ արտաքին հարաբերությունների հանձնաժողովի նախագահ Վլադիմիր Կարապետյանն այսօր քննադատել է վերջին վեց տարիների ընթացքում իշխանությունների վարած արտաքին քաղաքականությունը:

«Մասնավորապես, որեւէ բան չի արվել հարեւան պետությունների հետ հարաբերությունների փակուղին ճեղքելու առումով ու մենք շարունակում ենք մնալ մեկուսացված»,-ասել է նա:

Խոսելով Հայաստանի եւ հարեւանների հարաբերությունների մասին` ՀԱԿ անդամն ասել է, որ «Վրաստանի հետ առկա լարվածությունը կամ չհասկացվածությունը, որը կար նախկինում, ցավոք, աճել է»:

Վլադիմիր Կարապետյանի կարծիքով, Վրաստանը, կարծես, ցանկություն չունի Հայաստանի հետ խորացված հարաբերություններ զարգացնել: 

«Մաքսային միությանը միանալու մեր հայտարարության ու ԵՄ-ի հետ Վրաստանի Ասոցացման համաձայնագրի նախաստորագրելու հետ կապված նոր մարտահրավերներ կառաջանան, եւ պետք է հնարավորինս ջանքեր գործադրենք` կանգնեցնելու այն սառեցումը, որն առկա է երկու երկրների միջեւ», - ասել է ՀԱԿ անդամը:

Իրանի հետ հարաբերություններում եւս ՀԱԿ անդամը դրական զարգացում չի տեսնում: «Գրանցվել է առեւտրաշրջանառության շուրջ 10 % անկում:  Իսկ Իրանի դեսպանի հայտարարությունները գազի գնի վերաբերյալ ցույց են տալիս, որ երկրների միջեւ կա որոշակի անվստահություն», - նկատել է Կարապետյանը:

«Թուրքիայի հետ գրանցել ենք փոխվստահության առավել նվազում: Հայտնվել ենք 2006-2007 թթ. իրավիճակում, երբ Թուրքիան փորձում էր հանդիպումներ ապահովել Հայաստանի իշխանության ներկայացուցիչների հետ` ապացուցելու միջազգային հանրությանը, որ կան որոշակի մակարդակի շփումներ: Այսօր հայ պաշտոնյաները կրկին խուսափում են հանդիպումներից` չցանկանալով Թուրքիայի ստի եւ կեղծիքների ջրաղացին ջուր լցնել», - ասել է նա:

Վլադիմիր Կարապետյանը լուրջ տեղաշարժ չի տեսնում նաեւ Լեռնային Ղարաբաղի հակամարտության կարգավորման հարցում: 

«Եթե Հայաստանը ցանկանում է վերադառնալ Մադրիդյան փաստաթղթին, ապա Ադրբեջանը, կարծես, հրաժարվում է դրանից` փորձելով ավելի նպաստավոր պայմաններ գտնել բանակցությունները շարունակելու համար»,- նշել է ՀԱԿ անդամը: