Երեւան: Մեդիամաքս: Կենտրոնական ընտրական հանձնաժողովի նախագահ Տիգրան Մուկուչյանը վստահ է, որ փետրվարի 18-ին «կայացել են բոլորովին նոր որակի ընտրություններ»:
Ինչպես հաղորդում է Մեդիամաքս-ը, այսօր լրագրողների հետ զրույցում ԿԸՀ նախագահն ասել է, որ նախորդ համապետական ընտրությունների համեմատ այս անգամ ընտրատարածքային ընտրական հանձնաժողովների անդամներն ավելի պատրաստված եւ պատասխանատու են մոտեցել իրենց աշխատանքին:
«Նախնական գնահատականով, կարելի է ասել, որ ընտրությունները ընթացել են բնականոն հունով, ՀՀ ընտրական օրենսգրքին համապատասխան»,- նշել է Տիգրան Մուկուչյանը:
ԿԸՀ նախագահի խոսքով, հանձնաժողովը դեռեւս գրավոր դիմում-բողոք չի ստացել, իսկ ընտրախախտումների վերաբերյալ բոլոր ահազանգերն ուսումնասիրվել են:
Պատասխանելով անձնագրերում կնիքների թանաքանյութի որակի մասին հարցին՝ Տիգրան Մուկուչյանը նկատել է, որ որոշ անձնագրերում այն վերացել է արհեստական միջամտության հետեւանքով:
Հավելենք, որ քվեարկության վերջնական արդյունքները կհրապարակվեն փետրվարի 25-ին: Վերահաշվարկ կազմակերպելուն ուղղված դիմումները ԿԸՀ կարող են ներկայացվել այսօր մինչեւ ժամը 18-ը:
