Երեւան: Մեդիամաքս: ՀՀ փոխվարչապետ Սուրեն Պապիկյանը եւ Հայաստանում ՌԴ դեսպան Սերգեյ Կոպիրկինն այսօր քննարկել են Գորիս-Կապան ճանապարհահատվածում ստեղծված իրավիճակը:
Ըստ փոխվարչապետի մամուլի ծառայության հաղորդագրության, նրանք ընդգծել են «Ռուսաստանի կարեւոր ու կառուցողական դերը լարվածության նվազեցման եւ ծագող խնդիրներին լուծումներ գտնելու տեսանկյունից»:
Կողմերը քննարկել են հայ-ռուսական հարաբերությունների զարգացման հեռանկարները՝ անդրադառնալով անվտանգության, պաշտպանության, էներգետիկայի, ենթակառուցվածքների, նոր տեխնոլոգիաների եւ ձեռներեցության զարգացման հարցերին: Անդրադարձ է կատարվել «Հարավկովկասյան երկաթուղու» աշխատանքին՝ ընդգծելով դրա նշանակությունը Հայաստանի տնտեսության զարգացման գործում:
Պապիկյանը եւ Կոպիրկինը քննարկել են նաեւ համագործակցությունն էներգետիկայի բնագավառում: Անդրադարձ է կատարվել «Ռոսատոմի» հետ համագործակցության ընդլայնմանը՝ ինչպես ԱԷԿ-ի նորոգման եւ արդիականացման ներկայիս աշխատանքներին, այնպես էլ նոր ատոմակայանի կառուցման անհրաժեշտությանն ու հեռանկարներին:
