Երեւան: Մեդիամաքս: Պաղեստինի նախագահ Մահմուդ Աբասը այսօր Ստրասբուրգում հայտարարել է, որ «բոլոր մոնոթեիստական կրոնները իրավունք ունեն ազատորեն իրականացնել իրենց ծեսերը Երուսաղեմում, որը Պաղեստինյան պետության մայրաքաղաքն է»:
Ինչպես հաղորդում է Մեդիամաքսը, այս մասին Մահմուդ Աբասը հայտնել է ԵԽԽՎ նիստի ժամանակ` պատասխանելով հայաստանյան պատվիրակության անդամ Նաիրա Զոհրաբյանի՝ Երուսաղեմի հայկական թաղամասի հանդեպ պաղեստինյան իշխանությունների դիրքորոշման մասին հարցին:
Ըստ Նաիրա Զոհրաբյանի, պաղեստինյան ինքնավարության ղեկավարի պատասխանն «անորոշ» էր:
Մեդիամաքսը հիշեցնում է, որ 2000թ. ՀՀ արտգործնախարար Վարդան Օսկանյանը հայտարարել էր, որ Հայաստանը դեմ է Երուսաղեմի հայկական եւ քրիստոնեական թաղամասերի բաժանմանը:
2000թ. օգոստոսին, Քեմփ-Դեվիդում կայացած բանակցությունների ձախողումից հետո, Յասեր Արաֆաթը հերքել էր իսրայելյան հաղորդագրությունները այն մասին, թե ինքը համաձայնվել էր Իսրայելի հսկողության տակ թողնել Երուսաղեմի Հայկական թաղամասը:
Այն ժամանակ Արաֆաթը պաղեստինյան Al-Ayyam թերթին ասել էր. «Հայկական թաղամասը մեզ է պատկանում. մենք ու հայերը մեկ ժողովուրդ ենք»: 2002թ. հոկտեմբերին Արաֆաթը Լոնդոնում լույս տեսնող արաբական Al-Hayat թերթին տված հարցազրույցում հայտարարել էր. «Իսրայելը ուզում էր վերահսկել Երուսաղեմի հայկական թաղամասը, իսկ ես ասացի նրանց, որ երբեք չեմ դավաճանի հայերին»:
