Երեւան: Մեդիամաքս: Մամուլի ազատության ցուցանիշով 2014 թվականին Հայաստանն աշխարհում զբաղեցնում է 78-րդ տեղը:
Ինչպես հաղորդում է Մեդիամաքս-ը, այս մասին է վկայում «Լրագրողներ առանց սահմանների» միջազգային կազմակերպության կողմից այսօր հրապարակված Մամուլի ազատության համաշխարհային ինդեքս-ը:
Նախորդ տարվա համեմատ`այս տարի Հայաստանը չորս կետով զիջել է դիրքերը վարկանշում: Վրաստանը զբաղեցնում է 84-րդ, իսկ Ադրբեջանը 160-րդ տեղերը:
«Հայաստանում, Վրաստանում, Մոլդովայում եւ Ղրղզստանում առկա է բազմակարծության նշանակալի մակարդակ եւ հարաբերականորեն քիչ է պետական գրաքննությունը: Սակայն առկա մեծ սոցիալական բեւեռացումն արտահայտվում է ԶԼՄ-ներում եւ լրագրողների գործունեության միջավայրում, որոնք հաճախ ենթարկվում են հետապնդումների: Նկատի ունենալով այն հանգամանքը, որ որոշ ԶԼՄ-ների քաղաքական ուղղվածությունը համընկնում է իր սեփականատիրոջ քաղաքական նախապատվության հետ, ԶԼՄ-ների աշխատակիցների խմբագրական անկախությունը նախկինի պես սահմանափակ է թվում»,- նշել են ինդեքսի հեղինակները:
Կազմակերպության գնահատականներով, 2013 թ.-ին Հայաստանում եւ Վրաստանում կայացած ընտրություններն առավել հանդարտ էին, քան նախորդները:
«Լրագրողների հանդեպ բռնության դեպքերը հազվադեպ էին: Հայաստանի հանրային հեռարձակողն առաջադիմել է անկողմնակալություն ապահովելու տեսանկյունից, սակայն ընտրական միջավայրը խորացնում է տեղեկատվական պատերազմը մասնավոր ԶԼՄ-ներում, պատերազմ, որում իշխանություններն ունեն հստակ առավելություն», - ասված է ինդեքսում:
Հետխորհրդային երկրներից Ադրբեջանը, Թուրքմենստանը, Ուզբեկստանը եւ Ղազախստանը ամենաշատն են խախտում տեղեկատվության ազատության նորմերը:
«Լրագրողներ առանց սահմանների» կազմակերպությունը նշել է, որ Ադրբեջանում, որտեղ ԶԼՄ-ների բազմակարծությունը վտանգված է, մամուլի ազատության նոր ճնշումներ են որդեգրվել:
