Երեւան: Մեդիամաքս: Հունվարի 24-ին Բրյուսելում՝ Եվրոպական Խորհրդարանում, տեղի է ունեցել «Պահպանելով Լեռնային Ղարաբաղի մշակութային եւ հոգեւոր ժառանգությունը» խորագրով խորհրդաժողովը:
Բացման խոսքով հանդես են եկել Բելգիայում եւ Եվրամիությունում Հայաստանի դեսպան Տիգրան Բալայանը եւ Եվրոխորհրդարանի պատգամավոր Միրիամ Լեքսմանը:
Մայր Աթոռից հայտնում են, որ Ադրբեջանի կողմից հայոց սրբավայրերի թիրախավորման, պատմամշակութային արժեքների ոչնչացման քաղաքականության եւ այդ ուղղությամբ միջազգային հանրության կողմից ձեռնարկվելիք քայլերի հրատապության մասին զեկույցով հանդես է եկել Մայր Աթոռ Սուրբ Էջմիածնի Քարոզչական կենտրոնի տնօրեն եւ Արցախի հոգեւոր-մշակութային ժառանգության հարցերով գրասենյակի բաժնի վարիչ Հոգեշնորհ Տ. Գարեգին վարդապետ Համբարձումյանը:
Նա կոչ է արել պաշտպանել Լեռնային Ղարաբաղի մշակութային եւ կրոնական ժառանգությունը, հարգել կրոնի, հավատքի ազատությունը, որն ամրագրված է միջազգային մի շարք պայմանագրերով, ինչպես նաեւ հնարավորություն ընձեռնել ՅՈւՆԵՍԿՕ-ի անկախ գնահատման առաքելության ներկայացուցիչներին այցելելու տարածաշրջան եւ փաստագրելու մշակութային հուշարձանների կարգավիճակը:
