Երեւան։ Մեդիամաքս։ Հայաստանի ներկայացուցիչ Եղիշե Կիրակոսյանը Արդարադատության միջազգային դատարանում կայացած լսումների ժամանակ ասել է, որ գրեթե բոլոր հայերը ստիպված են եղել լքել Լեռնային Ղարաբաղը։
Ինչպես հաղորդում է ՏԱՍՍ-ի թղթակիցը Հաագայից, նիստը նվիրված էր ապահովող միջոցներին, որոնց ընդունումը հայկական կողմը հայցել է որպես Ռասայական խտրականության բոլոր ձեւերի վերացման միջազգային կոնվենցիայի խախտման համար Ադրբեջանի դեմ ներկայացված հայցի մաս:
«Լեռնային Ղարաբաղում գործնականում էթնիկ հայեր չեն մնացել։ Եթե դա էթնիկ զտում չէ, ապա ես չգիտեմ, թե ինչը կարելի է անվանել էթնիկ զտում»,- ասել է Կիրակոսյանը։
Հայաստանի ներկայացուցչի խոսքով՝ այդ գործողությունների համար Ադրբեջանի պատասխանատվությունը պետք է սահմանվի գործն ըստ էության քննելիս։
«Սակայն, դուք դեռեւս կարող եք էական ազդեցություն ունենալ այսօր տիրող իրավիճակի վրա: Դեռ ժամանակ կա թույլ չտալու, որ էթնիկ հայերի հարկադիր վերաբնակեցումն անդառնալի դառնա, պաշտպանելու Լեռնային Ղարաբաղում փոքրաթիվ էթնիկ հայերին, ինչպես նաեւ առեւանգվածներին եւ ապօրինաբար ադրբեջանական բանտերում պահվողներին», - ասել է Եղիշե Կիրակոսյանը՝ դիմելով դատավորներին:
«Այս պայմաններում Լեռնային Ղարաբաղում էթնիկ հայերի իրավունքները պաշտպանող միայն նպատակային, հստակ ապահովող միջոցները կկարողանան կանխել Ադրբեջանի կողմից իրականացվող էթնիկ զտումների շարունակությունը», - ասել է Հայաստանի ներկայացուցիչը։
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: