Երեւան: Մեդիամաքս: ՀՀ պաշտպանության նախարարության ներկայացուցիչ Արծրուն Հովհաննիսյանն այսօր ասել է, որ հարավում իրավիճակը շարունակում է թեժ մնալ։
Նա փաստել է, որ Ադրբեջանն այս անգամ եւս չի պահպանել մարդասիրական հրադադարի պայմանավորվածությունը եւ վաղ առավոտից վերկսել է ռազմական գործողությունները։
Արծրուն Հովհաննիսյանն ասել է, որ հյուսիսում հակառակորդը որեւէ արդյունքի չի հասել եւ հետ է շպրտվել։
Հարավում Ադրբեջանը գործողություններ է վարել երկու ուղղությամբ, որոնցից մեկում ունեցել է տեխնիկայի եւ զինամթերքի էական կորուստներ։ «Երկրորդ ուղղության վրա ունեցել են որոշակի տեղաշարժեր», - ասել է Արծրուն Հովհաննիսյանը՝ նշելով, որ այս պատերազմի կրակային մեծ խտության պայմնաններում «առանձին բնագծերի կամ տեղանունների քննարկումը ակտուալ չէ»։
Ժամը 20:30-ի տվյալներով հայկական կողմը խոցել է հակառակորդի 9 ԱԹՍ, որոնցից երկուսը՝ Հայաստանի Հանրապետության օդային տարածքում։
