Երեւան: Մեդիամաքս: Ռուբեն Վարդանյանի միջազզային պաշտպան Ջարեդ Գենսերն ասել է, որ Բաքվում պահվող հայ գերիների ազատ արձակումը ԱՄՆ նոր վարչակազմի համար «առաջնահերթ խնդիր է»:

«Մեզ ասվել է, որ նրանց ազատությունը պետք է լինի նախապայման, որպեսզի նախագահ Թրամփը վերջնական աջակցություն հայտնի խաղաղության պայմանագրին», - ասել է Գենսերը Catholic News Agency-ի հետ զրույցում:

«Կարծում եմ` դա իսկապես կարևոր զարգացում է, քանի որ մեր ամենամեծ մտավախությունն այն էր, որ եթե խաղաղության գործընթացը շարունակվի՝ առանց հաշվի առնելու  Լեռնային Ղարաբաղի կամ հայ քրիստոնյա գերիների հարցի լուծումը, ապա դժբախտաբար, դա կարող է հանգեցնել այդ բանտարկյալների զոհաբերմանը՝ որպես այդ համաձայնության մի մաս», - ասել է փաստաբանը:

Ըստ Գենսերի, այս կարևոր  հարցերից ներկայիս խաղաղության պայմանագրում ոչ մեկը ներառված չէ, դրանք  չկան նաև երկկողմ օրակարգում: Այնուամենայնիվ, նրա խոսքով,  Թրամփի վարչակազմը կարող է շատ բան անել այս նպատակներին հասնելու համար:

Գենսերը հրաժարվել է ասել, թե ինչ կոնկրետ մեթոդներ պետք է կիրառվեն Ադրբեջանի նախագահ Իլհամ Ալիևի վրա ճնշում գործադրելու համար, չնայած նա խրախուսեց Թրամփի վարչակազմին «ցնցել» Ադրբեջանի նախագահին, ում նա բռնապետ է համարում:

«Ի վերջո, բռնապետները քաղբանտարկյալներին ազատ են արձակում միայն այն ժամանակ, երբ  ստիպված են դա անել: Նրանք երբեք դա չեն անում մեծահոգությունից կամ մարդասիրական մղումներից ելնելով: Դա տեղի է ունենում միայն այն ժամանակ, երբ բռնապետը տեսնում է, որ քաղբանտարկյալին կամ քաղբանտարկյալներին կալանքի տակ պահելն իր վրա ավելի թանկ է նստում, քան ազատ արձակելը», - ավելացրել է պաշտպանը:

Գենսերն ասել է, որ խաղաղությունը հնարավոր չի լինի, քանի դեռ «բոլոր խնդիրները չեն բացահայտվել, բանակցվել և լիովին լուծվել խաղաղության պայմանագրի շրջանակներում»:

«Խաղաղության պայմանագիրը, որը չլուծված է թողնում Լեռնային Ղարաբաղի ժողովրդի ապագան և հայ քրիստոնյա գերիների ազատ արձակումը, ապագա բռնկումների, տարաձայնությունների և նույնիսկ հնարավոր պատերազմի բաղադրատոմս է», - նշել է նա: