Երեւան։ Մեդիամաքս։ Հայաստանի վարչապետ Նիկոլ Փաշինյանն այսօր ասել է, որ «Հայաստանի բանակի համարժեք եւ արդյունավետ պատասխան գործողություններից հետո Ադրբեջանի հրետակոծության ինտեսիվությունը Սոթքի ուղղությամբ որոշակի նվազել է»։
«Ադրբեջանի այս սադրիչ գործողությունների նպատակն է զրոյացնել այն առաջընթացը, որ գրանցվել է մայիսի 1-ից 4-ը Վաշինգտոնում տեղի ունեցած բանակցությունների ընթացքում։ Ադրբեջանի նպատակն է նաեւ խաթարել կիրակի Բրյուսելում եռակողմ ֆորմատով, իսկ հունիսի 1-ին Քիշնեւում հնգակողմ ֆորմատով նախատեսված բանակցությունները։ Փորձը ցույց է տալիս, որ Ադրբեջանին բանակցային գործընթացը հարկավոր է միայն էսկալացիայի եւ պատերազմի պատճառաբանության համար, իսկ էսկալացիաներն օգտագործվում են բանակցությունների ընթացքում որեւէ առաջընթաց զրոյացնելու համար»,- կառավարության նիստում ասել է Նիկոլ Փաշինյանը։
«Նաեւ նպատակ ունեն շեղել միջազգային հանրության ուշադրությունը Լաչինի միջանցքում ապօրինի անցակետ տեղադրելու փաստից»,- ասել է նա։
Նիկոլ Փաշինյանը նշել է, մտադիր է կիրակի օրը մեկնել Բրյուսել:
«Ադրբեջանի հետ խաղաղության պայմանագրի ստորագրման հնարավորությունը շատ փոքր է, որովհետեւ այն դեռ շատ նախնական տեսք ունի։ Խնդիր ունենք հնարավորինս արագ հասունացնել այդ փաստաթուղթը եւ պատրաստել ստորագրման»,- հավելել է նա:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: