Երեւան։ Մեդիամաքս։ Խորվաթիայի ԱԳ նախարար Գորդան Գրլիչ Ռադմանն այսօր ասել է, որ «Եվրամիության առաքելության գործուղումը Հայաստան ժամանակավոր գործիք է հետագա կայունության համար»:
«Այս առաքելությունը ժամանակավոր գործիք է հետագա կայուն եւ երկարաժամկետ խաղաղության գործում։ Սա որեւէ կերպ ստատուս քվո չի երաշխավորում»,-ՀՀ ԱԳ նախարար Արարատ Միրզոյանի հետ համատեղ ասուլիսի ժամանակ ասել է Գորդան Գրլիչ Ռադմանը։
Իր հերթին Արարատ Միրզոյանն ասել է, որ ԵՄ-ն, ինչպես ողջ միջազգային հանրությունը, «շատ լուրջ դեր ունեն խաղալու եւ Լեռնային Ղարաբաղի իրավունքների ու անվտանգության ապահովման հետագա քննարկման հարցում, եւ՛ առկա բլոկադայի վերացման հարցում, եւ տարածաշրջանում»:
«Ճանապարհը մեկն է՝ խաղաղ բանակցություններ եւ դիվանագիտական ճանապարհ։ Այդտեղ միջազգային հանրությունը եւ, մասնավորապես, ԵՄ-ն դեր ունեն խաղալու», - ասել է Արարատ Միրզոյանը։
Ինչ վերաբերում է Ռուսաստանի հետ հարաբերություններին, Արարատ Միրզոյանն ասել է, որ «Մոսկվայի հետ ունենք դաշնակցային հարաբերություններ, կան բազմաթիվ երկկողմ եւ բազմակողմ համաձայնություններ»:
«Որոշակի հարցերում կան նաեւ անհամաձայնություններ, ընդ որում՝ հրապարակային, այդ թվում՝ ՀԱՊԿ-ի դերակատարման, քաղաքական գնահատականների կամ դրանց բացակայության հետ կապված:
Դրանք ճգնաժամ անվանելը, երեւի թե, չափազանց ուռճացված կլինի: Մենք մշտապես կապի մեջ ենք մեր ռուսաստանյան գործընկերների հետ։ Քննարկում ենք բազմաճյուղ օրակարգի բոլոր հարցերը»,- ասել է Արարատ Միրզոյանը:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: