Երեւան: Մեդիամաքս: Ադրբեջանի նախագահ Իլհամ Ալիեւն այսօր ասել է, որ «Էմանյուել Մակրոնի ոչ տեղին եւ սադրիչ հայտարարություններից հետո» Փարիզն այլեւս չի կարող որպես միջնորդ մասնակցել հայ-ադրբեջանական հարաբերությունների կարգավորմանը։
«Պրահայի հանդիպումից ընդամենը մեկ շաբաթ անց Ֆրանսիայի նախագահը վիրավորական, անընդունելի, կեղծ եւ սադրիչ հայտարարություններ արեց։ Նա մեղադրել է Ադրբեջանին սարսափելի պատերազմ հրահրելու մեջ՝ շահարկելով փաստերը եւ փորձելով մոլորության մեջ գցել ֆրանսիական եւ համաշխարհային հանրությանը»,- ասել է Ալիեւը՝ ելույթ ունենալով Աստանայում ԱՊՀ գագաթնաժողովում։
Նրա խոսքով, Ֆրանսիայի նախագահը նաեւ կանխակալ հայտարարություններ է արել Ռուսաստանի Դաշնության վերաբերյալ, ասելով, որ «Ռուսաստանը խաղացել է ադրբեջանական խաղը»։
«Արդյո՞ք քաղաքականապես կոռեկտ է մեծ երկրի նախագահի համար փողոցային բառապաշար օգտագործելը: Դա թող որոշի ֆրանսիական հասարակությունը: Մենք կտրականապես դատապարտում եւ մերժում ենք նման հայտարարությունները»,- հավելել է Ալիեւը։
«Չնայած Ֆրանսիան կապ չունի Ադրբեջանի եւ Հայաստանի հարաբերությունների հետ, Ադրբեջանը, դրսեւորելով բարի կամք, թույլ էր տվել Ֆրանսիայի նախագահին մասնակցել Պրահայի հանդիպմանը»,- ավելացրել է Ալիեւը։
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: