Երեւան: Մեդիամաքս: Հայաստանի եւ Իրաքի արտգործնախարարներ Էդվարդ Նալբանդյանը եւ Իբրահիմ Ալ Ջաաֆարին Նյու Յորքում կայացած հանդիպմանը քննարկել են միջազգային հարթակներում համագործակցության սերտացման հնարավորությունները:

Զրուցակիցները քննարկել են երկկողմ առեւտրատնտեսական կապերի ակտիվացման ուղիները՝ կարեւորելով հայ-իրաքյան միջկառավարական հանձնաժողովի գործունեությունը, որի հերթական նիստը կգումարվի Երեւանում սեպտեմբերի 25-26-ին:

ԱԳՆ հաղորդագրության համաձայն, Իրաքի արտգործնախարարը ներկայացրել է Իրաքում առկա իրավիճակը եւ կենտրոնական իշխանությունների մոտեցումները Քուրդիստանում ծրագրված հանրաքվեի առնչությամբ։