Երեւան: Մեդիամաքս: ՀՅԴ Գերագույն մարմնի ներկայացուցիչ Արմեն Ռուստամյանն այսօր հայտարարել է, որ առաջիկա ԱԺ ընտրությունների հեռանկարը պայմանավորված է համամասնական ընտրակարգին անցնելու հարցի հանգուցալուծմամբ:
Ինչպես հաղորդում է Մեդիամաքս-ը, այս մասին Արմեն Ռուստամյանն ասել է ՀՅԴ եւ “Ժառանգություն” կուսակցության ` 100 տոկոսանոց համամասնական ընտրական համակարգին անցնելու առաջարկի շուրջ հրավիրած կլոր-սեղան քննարկման ընթացքում:
“Պետք է օր առաջ անցնել 100 տոկոսանոց համամասնական ընտրակարգին: Մենք վստահ ենք, որ ԱԺ-ում արդեն շրջանառության մեջ դրված մեր օրենսդրական առաջարկությունը չի առաջացնի որեւէ տեխնիկական, ընթացակարգային դժվարություններ”,- ասել է ՀՅԴ ԳՄ ներկայացուցիչը:
Նրա խոսքով, եթե այս հարցով քաղաքական մեծամասնության եւ ընդդիմության միջեւ սկզբունքային տարաձայնություններ չկան, ապա ոչինչ չի խանգարում այդ ընտրակարգին անցնել հենց ԱԺ ընտրություններին ընդառաջ:
“Քաղաքական մեծամասնությունը պետք է հստակ պատասխանի, թե ինչն է խանգարում անել դա հենց այս ընտրությունների նախաշեմին”,- նշել է Արմեն Ռուստամյանը եւ առաջարկել անհրաժեշտության դեպքում հարցը դնել հանրաքվեի:
Ադրբեջանի Միլի Մեջլիսի 125 պատգամավորներն ընտրվում են բացառապես մեծամասնական ընտրական համակարգով:
“Ժառանգություն” կուսակցության փոխնախագահ Ռուբեն Հակոբյանը, անդրադառնալով իշխանության կողմից այս առաջարկին դեմ բերվող հիմնական փաստարկներին, նշել է, որ ընտրություններին հիմնական կեղծիքներն արվում են մեծամասնական համակարգի միջոցով:
Նրա խոսքով, ՀՅԴ եւ “Ժառանգության” համատեղ առաջարկը չի հակասում Սահմանադրությանը:
Քննարկմանը ներկա “Բարգավաճ Հայաստան” խմբակցության պատգամավոր Նաիրա Զոհրաբյանն ասել է, որ խմբակցությունը դեռ չի քննարկել ՀՅԴ-ի եւ “Ժառանգության” ներկայացրած օրենսդրական նախաձեռնությունը, բայց ինքն անձնապես կողմ է համամասնական ընտրակարգին անցնելուն:
Իսկ “Օրինաց երկիր” խմբակցության ներկայացուցիչ Հովհաննես Մարգարյանը նշել է, որ 100 տոկոսանոց ընտրակարգին պետք է անցնել փուլ առ փուլ:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: