Երեւան: Մեդիամաքս: Այսօր «Այբ» դպրոցն ու Գյոթե ինստիտուտը ստորագրել են համագործակցության հուշագիր՝ «Դպրոցներ. ապագայի գործընկերներ» (PASCH) նախաձեռնության շրջանակում:
PASCH ցանցում ներառված է աշխարհի 1800-ից ավելի դպրոց, որոնցում գերմաներենին հատուկ ուշադրություն է հատկացվում:
«Ես տպավորված եմ «Այբ» դպրոցով: Այն մի դպրոց է, որն ինձ կրկին ցույց է տալիս, թե ինչպիսի մեծ ներուժ է թաքնված Հայաստանում: Դեսպանությունն անչափ ուրախ է PASCH նախաձեռնության շրջանակներում Գյոթե ինստիտուտի եւ «Այբ» դպրոցի ապագա համագործակցության համար՝ ուղղված գերմաներենի ամրապնդմանը: Վստահ եմ, որ այս համատեղ նախագիծն անչափ օգտակար կլինի»,- ասել է ՀՀ-ում Գերմանիայի դեսպան Մաթիաս Քիսլերը:
«Ճանաչվելով գործընկեր դպրոց՝ մենք դառնում ենք գերմաներենի որակյալ եւ խորացված ուսուցում ապահովող հաստատություն, եւ մեր աշակերտները ընդլայնում են Գերմանիայի Դաշնությունում իրենց կրթությունը շարունակելու հնարավորությունները: Այսօր գերմաներենի իմացությունը օրակարգային է դարձել, քանի որ գերմանալեզու կրթությունը ապահովում է եվրոպական տնտեսությունը որակյալ մասնագիտական ներուժով, ինչը հանդիսանում է վերջինիս զարգացման կարեւորագույն նախադրյալը»,- նշել է «Այբ» դպրոցի տնօրեն Արամ Փախչանյանը:
««Այբ» դպրոցն ընտրելով՝ մենք PASCH ցանցում ներգրավել ենք մի գերժամանակակից դպրոց, որն իր դասավանդման մեթոդաբանական եւ մանկավարժական հայեցակարգերով Հայաստանում փարոսի գործառույթ է կատարում»,- ասել է Հայաստանում Վրաստանի Գյոթե ինստիտուտի ներկայացուցիչ Յուլիա Քրամերը:
Կարծիքներ
Հարգելի այցելուներ, այստեղ դուք կարող եք տեղադրել ձեր կարծիքը տվյալ նյութի վերաբերյալ` օգտագործելուվ Facebook-ի ձեր account-ը: Խնդրում ենք լինել կոռեկտ եւ հետեւել մեր պարզ կանոներին. արգելվում է տեղադրել թեմային չվերաբերող մեկնաբանություններ, գովազդային նյութեր, վիրավորանքներ եւ հայհոյանքներ: Խմբագրությունն իրավունք է վերապահում ջնջել մեկնաբանությունները` նշված կանոնները խախտելու դեպքում: