Երեւան: Մեդիամաքս: ՀԱԿ խմբակցության անդամ, նախկին վարչապետ Հրանտ Բագրատյանն այսօր ասել է, որ ՀՀ նախագահի կողմից ցուցում կա, թե ում հարկել, ում՝ ոչ:
Ինչպես հաղորդում է Մեդիամաքս-ը, քննադատելով 2013թ. պետբյուջեի նախագիծը, Հրանտ Բագրատյանն ասել է, որ «տնտեսության տարբեր ոլորտները շարունակելու են անհամաչափ հարկվել, մասնավորապես, ադեկվատ չի հարկվում ֆինանսական համակարգը»:
«Ստվերի հիմնական մասը բաժին է ընկնում պետության հետ փոխկապակցված խոշոր ընկերություններին»,- ասել է նա:
Հրանտ Բագրատյանը նշել է, որ պետբյուջեի նախագծով ձեւավորված չեն միջոցներ տնտեսական աճն ապահովելու համար: «Իմ հաշվարկներով, 2013 թ-ին Հայաստանում կենսամակարդակը կնվազի 5%-ով, իսկ 2014-ին՝ եւս 5%-ով՝ կապված պարտադիր կուտակային կենսաթոշակային համակարգի ներդրման հետ»,- ասել է նա:
Մեկնաբանելով «Դուինգ Բիզնես» վարկանիշային ցանկում Հայաստանի կողմից վերջերս արձանագրված առաջընթացը` Հրանտ Բագրատյանն ասել է, որ Հայաստանի ներդրումային դաշտի մասին լավագույնս վկայում է ուղղակի արտասահմանյան ներդրումների այս տարի գրանցված զգալի անկումը:
