2018 թվականի նոյեմբերի 12-ին Երեւանի կոնյակի գործարանը (ԵԿԳ) հայտնեց ARARAT Charles Aznavour Signature Blend նախագծի մեկնարկի մասին: Այն հանդիսանում է մեծն արտիստի եւ միջազգային բրենդի համատեղ աշխատանքի արդյունքը՝ սկսված դեռեւս 2017 թվականին: 

Երեւանի կոնյակի գործարանը եւ Մեդիամաքսը ներկայացնում են համատեղ հատուկ նախագիծ, որը «խճանկարի» ոճով կպատմի, թե ինչպիսինն էին Շառլ Ազնավուրի համար 1956, 1960 եւ 1981 թվականները: ARARAT Charles Aznavour Signature Blend-ի բացառիկ կուպաժը բաղկացած է հենց այդ տարիների հազվագյուտ վինտաժային սպիրտներից, որոնք արտացոլում են Շառլ Ազնավուրի ստեղծագործական ուղու կարեւորագույն պահերը: 

Լուսանկարը` Երեւանի կոնյակի գործարան

1956 թվականին աշխարհում տեղի են ունենում կարեւոր, հետաքրքիր եւ դրամատիկ իրադարձություններ: ԽՍՀՄ XX համագումարի փակ նիստում Նիկիտա Խրուշչովը հանդես է գալիս Ստալինի քաղաքականության սենսացիոն բացահայտումներով: Սովետական զորքերը ճնշում են ապստամբությունը Բուդապեշտում: ԱՄՆ-ի նախագահական ընտրություններում հաղթանակ է տանում գործող նախագահ Դուայթ Էյզենհաուզերը: Մելբուրնում անցկացվում են Օլիմպիական խաղերը, իսկ շվեյցարական Լուգանո քաղաքում առաջին անգամ տեղի է ունենում «Եվրատեսիլ» երգի մրցույթը: Նեվադայում առաջին համերգով հանդես է գալիս Էլվիս Փրեսլին, իսկ Լենինգրադի օպերայի եւ բալետի թատրոնը ներկայացնում է Արամ Խաչատրյանի «Սպարտակ» բալետի պրեմիերան: 

1956-ին Ֆրանսիայում ամեն ինչ հիմնականում հանդարտ էր, սակայն Շառլ Ազնավուրի համար հենց այս տարին է դառնում շրջադարձային: 

1956 թվականին նա փառահեղ ելույթ է ունենում փարիզյան հայտնի «Օլիմպիա» դահլիճում՝ անելով դեպի մեծ փառք տանող առաջին քայլը: 

«Օլիմպիա»-ն՝ Ֆրանսիայի մայրաքաղաքի ամենահին գործող համերգային դահլիճն է: Այն գտնվում է Կապուցինների բուլվարում, Փարիզի 9-րդ թաղամասում: «Օլիմպիա»-ն միանգամից աչքի է ընկնում է ճակատային մասում փակցված կարմիր մեծ վահանակով: 

***

1956թ-ին Շառլ Ազնավուրը միանգամից մի քանի հիթ է ձայնագրում.

Sa jeunesse («Այս երիտասարդությունը»), Parce que («Որովհետեւ»), Apres l'amour («Սիրուց հետո»):

***

1956 թվականին Շառլ Ազնավուրի ծնողները որոշում են մկրտել նրա դուստր Սեդային, որն ինը տարեկան էր:  

«Անցյալն ու ապագան» ինքնակենսագրական գրքում Ազնավուրը պատմում է, որ արարողությունը տեղի ունեցավ հայկական եկեղեցում, որից հետո մոտ 40 հյուրեր հավաքվեցին Լամարտեն փողոցում գտնվող հայտնի հայկական «Յասաման» ռեստորանում:

«Հորս կազմակերպչական ձիրքի շնորհիվ սեղանը լի է կերակուրներով, խմիչք էլ գետի պես հոսում էր՝ օղի, ռակիա, կարմիր գինի… Հայրս թամադան էր եւ արարողության գլխավոր ղեկավարը: 

Թամադան պետք է լինի պոետ, հռետոր, մի քիչ կատակերգակ, իսկ նրա՝ ասմունքողի կամ երգչի շնորհքը առավել քան ողջունելի են: Հայրս միշտ վարպետորեն էր գործում եւ կարող էր ժամեր շարունակ լարվածության մեջ պահել բաժակներն օդում պահած լսարանին: Տոնական սեղանի շուրջ հավաքվել էին տարբեր ազգությունների եւ հավատքների մարդիկ: Կենացները, ազգային ուտեստները, պանիրները, աղանդերը, սուրճը, կոնյակը եւ օշարակը վայելելիս ոչ ոք չնկատեց, որ սեղանի շուրջ 9 ժամ անցկացրինք»,- գրում էր Ազնավուրը: 

***

Արխիվային լուսանկարները թույլ են տալիս վերականգնել 1956 թվականի Շառլ Ազնավուրի կյանքի այլ դրվագներ եւս: 

***

Ահա 1956 մարտին նա ելույթ է ունենում նախկին գինու մառանում բացված փարիզյան ակումբներից մեկում:  

Լուսանկարը` Getty Images

***

1956 թվականի հոկտեմբերին Ազնավուրը կոտրել էր ձեռքը եւ որոշ ժամանակ ստիպված էր ապավինել բարեկամների օգնությանը: 

Լուսանկարը` Getty Images

***

Ամենայն հավանականությամբ, նոյեմբերին գիպսն արդեն հանել էին, քանի որ 1956 թվականի նոյեմբերին թվագրված այս լուսանկարում մենք տեսնում ենք Ազնավուրին՝ Սեդայի հետ, Փարիզի կրկեսում:  

Լուսանկարը` Getty Images