Ամերիկյան Time ամսագիրը ընտրել է «Բոլոր ժամանակների ամենաազդեցիկ 100 լուսանկարները»: Մեդիամաքսը պարբերաբար իր ընթերցողներին է ներկայացնում Time-ի պատմությունները այդ լուսանկարների ստեղծման մասին:

Կո Ռենթմեյսթեր, Մայքլ Ջորդանը, 1984թ.

Հնարավոր է, որ սա երբեւէ լուսանկարված ամենահայտնի ուրվանկարն է:

1984 թվականին, լուսանկարելով Մայքլ Ջորդանին LIFE ամսագրի համար, Յակոբուս «Կո» Ռենթմեյսթերին հաջողվեց որսալ մի կադր, որում բասկետբոլի աստղը «ճախրում է» օդում՝ «դանք» կատարելու համար:

Այդ տարիներին Nike ընկերությունը դիզայներական ոգեշնչում էր փնտրում Air Jordan մոդելի համար: Nike-ը 150 դոլար վճարեց Ռենթմեյսթերին` վերջինիս կադրը ժամանակավոր օգտագործելու նպատակով: Այնուհետեւ ընկերությունը լուսանկարչին վճարեց 15 000 դոլար՝ երկու տարվա արտոնագրի համար, սակայն շարունակեց օգտագործել պատկերը նաեւ ժամկետը լրանալուց հետո:

Nike Jordan բրենդի լոգոն գրանցեց 1987 թվականին եւ շուտով «Jumpman»-ը հայտնվեց կոշիկների, հագուստի, պաստառների վրա՝ դառնալով բոլոր ժամանակների ամենահայտնի ապրանքանիշերից մեկը: 2014 թվականին Air Jordan բրենդի հասույթը կազմեց 3.2 միլիարդ դոլար:

Ռենթմեյսթերը Nike-ին դատի էր տվել՝ հեղինակային իրավունքները խախտելու համար, սակայն 2015 թվականին Պորտլենդի դատարանը մերժեց նրա հայցը:

Time ամսագիր

Պատրաստեց Աննա Բուբուշյանը