Ամերիկյան Time ամսագիրը ընտրել է «Բոլոր ժամանակների ամենաազդեցիկ 100 լուսանկարները»: Մեդիամաքսը պարբերաբար իր ընթերցողներին է ներկայացնում Time-ի պատմությունները այդ լուսանկարների ստեղծման մասին:

Բրենթ Սթիրտոն, Սենկվեկվե գորիլան

Լեռնային արծաթամեջք Սենկվեկվե գորիլան կշռում էր 227 կգ: Նրա դին ինքնաշեն պատգարակին ամրացնելուց հետո այն հատակից կարողացան պոկել միայն 12 տղամարդիկ:

Բրենտ Սթիրտոնը լուսանկարել է այս տեսարանը Կոնգոյի Դեմոկրատական Հանրապետության Վիրունգայի ազգային արգելոցում: Սենկվեկվեն եւ մի քանի այլ գորիլաներ սպանվել էին արգելոցում ծավալված դաժան հակամարտության արդյունքում: Այդ արգելոցում է բնակվում անհետացման եզրին գտնվող լեռնային գորիլաների կեսը:

Երբ 2007թվականին Սթիրտոնը լուսանկարեց Սենկվեկվեին հարգալից կերպով անտառից դուրս բերող բնակիչներին եւ արգելոցի աշխատակիցներին, անտառը պաշարում էին՝ ծառերը ապօրինի կտրելու եւ փայտածխի արդյունաբերության մեջ դրանք օգտագործելու նպատակով: Այդ գործողությունները թափ էին առել Ռուանդայի ցեղասպանությունից հետո:

Լուսանկարում պատկերած հսկա, բայց միանգամայն մարդկային տեսք ունեցող Սենկվեկվեն հիշեցում էր, որ Կենտրոնական Աֆրիկայի հակամարտությունները խլում են ոչ միայն մարդկանց, այլեւ կենդանիների կյանքը:

Newsweek ամսագրում Սթիրտոնի լուսանկարի հրապարակումից երեք ամիս անց Աֆրիկայի ինը երկրներ (ներառյալ Կոնգոն) ստորագրեցին իրավաբանորեն պարտավորեցնող պայմանագիր՝ Վիրունգայի լեռնային գորիլաների պաշտպանության մասին:

Time ամսագիր

Պատրաստեց Աննա Բուբուշյանը